Toshkent viloyati hokimi Zoir Mirzayev viloyatda uni tanqid qiluvchi deputatlar, faollar ko‘pligini aytib, “viloyat sessiyalarini ochiq, onlayn tarzda o‘tkazamiz, men hech qachon falonchiga so‘z deb, o‘qib eshittiriladigan sessiya o‘tkazmayman, buni o‘zlari ham bilishadi”, — dedi. Bu haqda hokim “Daryo” jurnalisti bilan suhbati davomida gapirib berdi.
Toshkent viloyati hokimi Xalq deputatlari Chirchiq shahar Kengashi deputati Jahongir To‘laganovning viloyat sessiyasida so‘z so‘rab ololmaganini aytib chiqqan, videomurojaatiga javob qaytardi.
Holat bunday olib qaralganda, qonunan to‘g‘ri. Talab qilgan masalasi ham to‘g‘ri. Lekin biz viloyat sessiyasini o‘tkazdik. Shahar va tumanlarni uladik. O‘sha kungi sessiyada ham reglament tasdiqlangandi. Agar sessiya qo‘shma sessiya bo‘lganida men ularni so‘rab olgan bo‘lardim. Qolaversa, o‘sha kuni sessiyada kichkina ekranda 22 ta tuman va shahar turibdi. Siz unda kim so‘z so‘rayotganini ko‘rmaysiz-da. Hali knopkani bossa, palonchi so‘z so‘rayapti degan davrlar ham kelar, — deydi holat haqida gapirgan hokim.
Zoir Mirzayevning ma’lumot berishicha, deputat Jahongir To‘laganov so‘z so‘ragan sessiyada 10 dan ortiq savollar bo‘lgan. Va katta muhokama o‘tkazilgan.
Men javobini (deputat chiqishiga) yozdim. Ko‘pchilik ko‘rdi. Marhamat, buning erta-kechi yo‘q. Bizga yozma savol bersa, javob ham beramiz. Men To‘laganovning o‘zi bilan gaplashganman, ko‘rishganman. Birinchi kuni ko‘rayotganim yo‘q. Lekin u talqin qilishda salgina qonuniy tomonini ham ko‘rsa, adolatli bo‘lar edi. To‘g‘ri, auditoriya bor, qo‘llab-quvvatlovchilar bor. Hech kim qarshimas, men ochiqlik tarafdoriman. Birovga adolat qilib, orqasidan quvish — mening xarakterimga to‘g‘ri kelmaydigan narsa. Xato hammamizda bor. Ishlamagan odam xato qilmasligi mumkin. Lekin fikr bildirayotganda jazavaga berilish, shaxsiyatga tegish nafaqat diplomatning, deputatning, oddiy odamning ham ma’naviyatiga to‘g‘ri kelmaydigan narsa bo‘lishi kerak-da, — deydi Zoir Mirzayev.
Toshkent viloyati hokimi baqir-chaqir qilib, yoqalashib ish bitkizadigan davlatlardan o‘rnak olmaslik kerak demoqda.
Deputatdan, boshqaruvchidan, menga o‘xshagan hokimdan xalq muomalani o‘rganadi, madaniyatni o‘rganadi, ma’naviyatimizga baho beradi. Savoli adolatli, o‘rinli. Xalq manfaati uchun qilyapti. E’tirozimiz yo‘q. Bizda meni tanqid qiladiganlar ko‘p. Viloyat sessiyalarini ochiq, onlayn tarzda o‘tkazamiz, men hech qachon falonchiga so‘z deb, o‘qib eshittiriladigan sessiya o‘tkazmayman, buni o‘zlari ham bilishadi. Bizning sessiyalarimiz ochiq, onlayn bo‘ladi. O‘zlari ham ko‘radi, — dedi hokim.
Izoh (0)