Тошкент вилояти ҳокими Зоир Мирзаев вилоятда уни танқид қилувчи депутатлар, фаоллар кўплигини айтиб, “вилоят сессияларини очиқ, онлайн тарзда ўтказамиз, мен ҳеч қачон фалончига сўз деб, ўқиб эшиттириладиган сессия ўтказмайман, буни ўзлари ҳам билишади”, — деди. Бу ҳақда ҳоким “Дарё” журналисти билан суҳбати давомида гапириб берди.
Тошкент вилояти ҳокими Халқ депутатлари Чирчиқ шаҳар Кенгаши депутати Жаҳонгир Тўлагановнинг вилоят сессиясида сўз сўраб ололмаганини айтиб чиққан, видеомурожаатига жавоб қайтарди.
Ҳолат бундай олиб қаралганда, қонунан тўғри. Талаб қилган масаласи ҳам тўғри. Лекин биз вилоят сессиясини ўтказдик. Шаҳар ва туманларни уладик. Ўша кунги сессияда ҳам регламент тасдиқланганди. Агар сессия қўшма сессия бўлганида мен уларни сўраб олган бўлардим. Қолаверса, ўша куни сессияда кичкина экранда 22 та туман ва шаҳар турибди. Сиз унда ким сўз сўраётганини кўрмайсиз-да. Ҳали кнопкани босса, палончи сўз сўраяпти деган даврлар ҳам келар, — дейди ҳолат ҳақида гапирган ҳоким.
Зоир Мирзаевнинг маълумот беришича, депутат Жаҳонгир Тўлаганов сўз сўраган сессияда 10 дан ортиқ саволлар бўлган. Ва катта муҳокама ўтказилган.
Мен жавобини (депутат чиқишига) ёздим. Кўпчилик кўрди. Марҳамат, бунинг эрта-кечи йўқ. Бизга ёзма савол берса, жавоб ҳам берамиз. Мен Тўлагановнинг ўзи билан гаплашганман, кўришганман. Биринчи куни кўраётганим йўқ. Лекин у талқин қилишда салгина қонуний томонини ҳам кўрса, адолатли бўлар эди. Тўғри, аудитория бор, қўллаб-қувватловчилар бор. Ҳеч ким қаршимас, мен очиқлик тарафдориман. Бировга адолат қилиб, орқасидан қувиш — менинг характеримга тўғри келмайдиган нарса. Хато ҳаммамизда бор. Ишламаган одам хато қилмаслиги мумкин. Лекин фикр билдираётганда жазавага берилиш, шахсиятга тегиш нафақат дипломатнинг, депутатнинг, оддий одамнинг ҳам маънавиятига тўғри келмайдиган нарса бўлиши керак-да, — дейди Зоир Мирзаев.
Тошкент вилояти ҳокими бақир-чақир қилиб, ёқалашиб иш биткизадиган давлатлардан ўрнак олмаслик керак демоқда.
Депутатдан, бошқарувчидан, менга ўхшаган ҳокимдан халқ муомалани ўрганади, маданиятни ўрганади, маънавиятимизга баҳо беради. Саволи адолатли, ўринли. Халқ манфаати учун қиляпти. Эътирозимиз йўқ. Бизда мени танқид қиладиганлар кўп. Вилоят сессияларини очиқ, онлайн тарзда ўтказамиз, мен ҳеч қачон фалончига сўз деб, ўқиб эшиттириладиган сессия ўтказмайман, буни ўзлари ҳам билишади. Бизнинг сессияларимиз очиқ, онлайн бўлади. Ўзлари ҳам кўради, — деди ҳоким.
Изоҳ (0)