Fransiyada mamlakatning eng yirik banki BNP Paribas filiali — BNP Paribas Securities Services va Kiprda ro‘yxatdan o‘tgan TCR International Limited brokerlik kompaniyasiga nisbatan “pul yuvish” jinoyatini sodir etganlikda gumon qilinib, dastlabki tergov boshlandi.
Bu haqda Fransiyaning Monde nashri Parij prokuraturasiga tayanib xabar berdi. Huquq-tartibot idoralari 2019- yildan 2021-yilgacha TCR International Limited orqali amalga oshirilgan bir nechta moliyaviy operatsiyalardan shubhalanishgan.
O‘shanda brokerlik kompaniyasi BNP Paribas Securities Services yordamida o‘z mijozlari nomidan investitsiya operatsiyalarini amalga oshirgan.
Prokuratura ma’lumotlariga ko‘ra, 220 million yevrodan ortiq kelib chiqishi shubhali pullar TCR International Limited hisob raqamlari orqali Fransiya bankiga o‘tgan. Shu bilan birga, Rossiya va Ukraina fuqarolari shubhali operatsiyalarda ishtirok etishgan.
Nashrning ta’kidlashicha, TCR International Amerika rasmiylari tomonidan “Vagner” XHK va uning asoschisi Yevgeniy Prigojin tomonidan qo‘llanishi mumkin bo‘lgan moliyaviy tarmoqlarga oid tekshiruvda tilga olinganidan keyin Fransiya huquq-tartibot idoralari e’tiboriga tushgan.
Parij prokuraturasi AQSH Adliya vazirligi Fransiyaga bu borada huquqiy yordam so‘rab murojaat qilganini tasdiqladi. Biroq Fransiya rasmiylari tomonidan olib borilgan tergovda mazkur moliya tashkilotlarining Yevgeniy Prigojin va uning tuzilmasi bilan-biror bir aloqasi aniqlanmagan.
Izoh (0)