AQSH prezidentligiga nomzod Donald Tramp 30 yil avval uni “Uyda yolg‘iz 2: Nyu-Yorkda yo‘qolgan bola” filmida epizodik rol o‘ynashga qanday qilib ko‘ndirishganini aytib berdi.
Filmda Tramp bir necha soniya davomida kadrda paydo bo‘ladi: bosh rol ijrochisi Kevin Makkallister (Makoley Kalkin) undan mehmonxona lobbisiga qanday borishni so‘raydi va u yo‘nalishni ko‘rsatib yuboradi.
Bir necha kun avval film rejissyori Kris Kolambus o‘z intervyusida Tramp unga tegishli mehmonxonada suratga olishga ruxsat berish uchun unga ham filmda rol berishni shart qilib qo‘yganini aytgan edi.
AQSH sobiq prezidenti esa bunga javoban film prodyuserlari va rejissyorlari undan filmda rol o‘ynashni iltimos qilib so‘rashganini ta’kidladi.
“Men juda band edim va filmda rol o‘ynashni xohlamadim. Prodyuserlar juda xushmuomala, shu bilan birga qat‘iyatli edi. Oxiri men rozi bo‘ldim, qolgani esa tarix”, — deb yozdi Tramp ijtimoiy tarmoqdagi sahifasida.
Tramp film hali ham muvaffaqiyat qozonayotganini, ayniqsa Rojdestvo bayrami arafasida, odamlar uni televizorda ko‘rganlarida unga qo‘ng‘iroq qilishlarini ta’kidladi. U rejissor Kolambus Tramp bu rolni shantaj orqali olganini aytganidan jahli chiqqanini ta’kidladi.
“Bu haqiqatdan uzoq gap”, — deb yozdi siyosatchi.
“O‘sha kameo filmning muvaffaqiyatiga yordam berdi. Lekin agar ular meni rolga qo‘yishni xohlamay, bu ishni majburan qilgan bo‘lsalar, nega men chiqqan sahnani filmda qoldirib, uni 30 yildan ortiq saqlab kelishmoqda? Chunki men bu filmga zo‘r tushganman va hozir ham shundayman”, — dedi Donald Tramp.
Izoh (0)