Surxondaryo viloyatining qator hududlarida gaz ta’minoti vaqtincha to‘xtatiladi. Bu haqda viloyat hokimligi matbuot xizmati xabar berdi.
Ma’lum qilinishicha, viloyat navbatchilik shtabiga kelib tushgan xabarga ko‘ra bugun, 28-dekabr kuni Bandixon tumanining “Polvontosh” mahallasi hududidan o‘tuvchi Muzrabot—Dushanbe magistral gaz quvurining 101-190 kilometrlari oralig‘idagi D-700 mm bo‘lgan magistral gaz quvurida avariya holati yuzaga kelgan.
Hozirda “O‘ztransgaz” tomonidan avariya holatini bartaraf etish va tabiiy gaz ta’minotini tiklash choralari ko‘rilmoqda. Shu munosabat bilan bugun soat 06:30 dan viloyatning quyidagi shahar va tumanlaridagi iste’molchilarga tabiiy gaz yetkazib berish vaqtincha to‘xtatildi:
- Termiz shahri;
- Bandixon tumani;
- Qiziriq tumani;
- Muzrabot tumani;
- Termiz tumani;
- Jarqo‘rg‘on tumani;
- Qumqo‘rg‘on tumani.
- Angor tumani;
- Sherobod tumani.
Ta’mirlash ishlari tugatilgandan so‘ng tabiiy gaz ta’minoti qayta tiklanadi.
Eslatib o‘tamiz, taʼmirlash ishlari tufayli 26-dekabr kuni Shahrisabz shahri, Chiroqchi, Yakkabog‘, Kitob va Shahrisabz tumanida tabiiy gaz taʼminoti vaqtincha to‘xtatilgandi.
Izoh (0)