“O‘zenergoinspeksiya” tomonidan huquqni muhofaza qiluvchi organlar va elektr hamda gaz taʼminoti korxonalari mutaxassislari bilan hamkorlikda 2023-yilning shu davriga qadar o‘tkazilgan nazorat tadbirlarida 9 ming 446 ta holatda isteʼmolchilar tomonidan tabiiy gaz va elektr energiyasidan noqonuniy foydalanish holatlari aniqlandi.
Xususan, 767 million metr kub tabiiy gaz (748 milliard 600 million so‘m) va 335 million kilovatt-soat elektr energiyasi (251 milliard 900 million so‘m) talon-toroj qilingan. Buning natijasida davlat manfaatlariga jami 1 trillion 500 million so‘m zarar yetkazilgan.
Shuningdek, 2 ming 134 ta maʼmuriy qoidabuzarlik holatlari aniqlangan. Buning natijasida 204 milliard so‘m miqdoridagi jarimalar undirishga qaratilib, “E-mamuriy ish” axborot tizim orqaliy sud organlariga yuborilgan.
Inspeksiyaning Toshkent markaziy nazorat-kimyo laboratoriyasi tomonidan neft mahsulotlari bo‘yicha olib borilgan sifat nazorati tadbirlari davomida xususiy avtomobillarga yoqilg‘i quyish shoxobchalarida 171 ta holatda 2 million 823 ming litr neft mahsulotlarining sifatsizligi aniqlanib, sotuvga chiqarilishi oldi olingan.
Bundan avval Andijon, Surxondaryo viloyatlari va Qoraqalpog‘istondagi metan zapravkalar faoliyatiga cheklov o‘rnatilgandi. Birinchi navbatda aholi, shifoxona, maktab hamda maktabgacha ta’lim tashkiloti kabi ahamiyatga ega muassasalarning tabiiy gaz ta’minoti barqarorligini ta’minlash maqsad qilingan. 12-dekabrdan gaz zapravkalarning ish vaqtiga o‘zgartirishlar kiritilib, soat 06:00 dan 12:00 gacha etib belgilandi.
Izoh (0)