Авария ҳолати сабаб Сурхондарёнинг 8 та тумани ва Термиз шаҳрида газ етказиб бериш вақтинча тўхтатилади

Сурхондарё вилоятининг қатор ҳудудларида газ таъминоти вақтинча тўхтатилади. Бу ҳақда вилоят ҳокимлиги матбуот хизмати хабар берди.

Маълум қилинишича, вилоят навбатчилик штабига келиб тушган хабарга кўра бугун, 28 декабрь куни Бандихон туманининг “Полвонтош” маҳалласи ҳудудидан ўтувчи Музработ—Душанбе магистрал газ қувурининг 101-190 километрлари оралиғидаги Д-700 мм бўлган магистрал газ қувурида авария ҳолати юзага келган.

Ҳозирда “Ўзтрансгаз” томонидан авария ҳолатини бартараф этиш ва табиий газ таъминотини тиклаш чоралари кўрилмоқда. Шу муносабат билан бугун соат 06:30 дан вилоятнинг қуйидаги шаҳар ва туманларидаги истеъмолчиларга табиий газ етказиб бериш вақтинча тўхтатилди:

• Термиз шаҳри;
• Бандихон тумани;
• Қизириқ тумани;
• Музработ тумани;
• Термиз тумани;
• Жарқўрғон тумани;
• Қумқўрғон тумани.
• Ангор тумани;
• Шеробод тумани.

Таъмирлаш ишлари тугатилгандан сўнг табиий газ таъминоти қайта тикланади.

Эслатиб ўтамиз, таъмирлаш ишлари туфайли 26 декабрь куни Шаҳрисабз шаҳри, Чироқчи, Яккабоғ, Китоб ва Шаҳрисабз туманида табиий газ таъминоти вақтинча тўхтатилганди.