Rossiya muftiysi muhojirlar masalasida Markaziy Osiyodagi hamkasblarini tanqid qildi

Markaziy Osiyo mamlakatlaridagi din arboblari har qanday huquqbuzarliklarga yo‘l qo‘ymaslik uchun muhojirlar bilan Rossiya hududida ham, ular mamlakatga kelishidan oldin ham faolroq ish olib borishi kerak, hozircha bunday aloqalar o‘rnatilmagan. Bu haqda Rossiya musulmonlari diniy assambleyasi rahbari, muftiy Albir Krganov ma’lum qildi, deb yozmoqda “TASS”.

“Migrantlar bilan ishlashda ularning mamlakatlari faolroq bo‘lishi kerak. Markaziy Osiyo davlatlarida saylovlar bo‘lsa, ularning diniy yetakchilari bu yerga keladi – har bir shaharda, hamma joyda muhojirlarni yig‘ib, ular o‘rtasida tashviqot ishlarini olib boradi.

Mayli, saylovlar o‘tkazildi, lekin, umuman olganda, muhojirlar bilan ishlash borasida, nega hamma sohani shunday tashkil qilmaysiz? Bu savol O‘zbekiston, Tojikiston va Qirg‘iziston muftiylariga qaratilgan – bu yerda tizimli ish bo‘lishi kerak, ular bu masaladan manfaatdor bo‘lishi kerak, bu ishni tashkillashtirishi kerak, chunki ularning fuqarolari shu yerda”, — dedi Krganov Rossiya Federatsiyasi Jamoatchilik palatasi davra suhbatida.

Uning qo‘shimcha qilishicha, Rossiyaga migrantlar oqimi ko‘p bo‘lgan mamlakatlar elchixonalari o‘z fuqarolari bilan bog‘liq muammolarga “ko‘proq eʼtibor” berishi lozim.

Aks holda, muftiyning so‘zlariga ko‘ra, Rossiyadagi hokimiyat va xavfsizlik kuchlari, shuningdek, mahalliy musulmon fuqarolar mas’uliyatni zimmasiga olishga majbur bo‘ladi.

“Millionlab fuqarolarini bu yerga jo‘natadigan mamlakatlar qayerda? Afsuski, men bu borada uch yildan beri birorta tizimli ishni ko‘rmayapman”, — deya xulosa qildi Krganov.

Eslatib o‘tamiz, 20-dekabr kuni Moskva yeparxiyasi assambleyasida so‘zlagan Patriarx Kirill Rossiyadagi muhojirlarning harakatlari mamlakatdagi dinlararo va millatlararo tinchlikka tobora ko‘proq tahdid solayotganini ta’kidlagan. Rus pravoslav cherkovi primati Rossiya jamiyatiga qo‘shilishni va uning an’analarini hurmat qilishni istamaydigan xorijliklarning joriy oqimi davom etsa, Rossiyani ko‘p millatli davlat sifatida yo‘qotish xavfi borligidan xavotir bildirgan.