Rossiya prezidenti Vladimir Putin Millatlar masalalari bo‘yicha federal agentlik rahbari Igor Barinovning muhojirlar uchun adaptatsiya (moslashish) markazlarini tashkil qilish bo‘yicha tashabbusini qo‘llab-quvvatladi, deb yozadi Meduza prezidentning mansabdor bilan uchrashuvi haqidagi Kreml xabariga tayanib.
Uchrashuvda Barinov Rossiya iqtisodiyoti chet eldan ishchi kuchi oqimiga ehtiyoj sezayotganini aytdi, ammo ko‘p sonli muhojirlar “etnomadaniy landshaft” o‘zgarishiga olib kelishi mumkin, bu esa anklavlar shakllanishi va etnik jinoyatlar o‘sishi xavfini oshiradi.
Ushbu muammolarni hal qilish uchun Millatlar masalalari bo‘yicha federal agentlik Rossiyada “adaptatsiya markazlari” tashkil qilish taklifini kiritdi, u yerda muhojirlar mahalliy an’analar, urf-odatlar, madaniyat haqida ma’lumotga ega bo‘lib, shuningdek, huquqiy va ruhiy ko‘mak olishi mumkin bo‘ladi.
Vladimir Putin bu g‘oyani qo‘llab-quvvatladi va bunday ishlarni “potensial muhojirlarning vatanidayoq” boshlash kerakligini qo‘shib qo‘ydi.
“U yerda hech kim bunga qarshi emas, hech kim norozi bo‘lmaydi. Aksincha, O‘zbekistonda, Tojikistonda, Qirg‘izistonda — marhamat, ularning hammasi buni mamnuniyat bilan amalga oshiradi. Biz faqat u yerda o‘zimizni faolroq tutishimiz kerak, ular hatto bundan manfaatdor. Odamlar vatanidan ketib, bizning mamlakatga kelganida moslashishi kerakligini, bizning madaniyatimiz, tilimizni, Rossiya qonunchiligini bilishi kerakligini ular juda yaxshi anglaydi”, — dedi prezident.
Nashr eslatishicha, avvalroq Rossiya Xavfsizlik kengashi raisi o‘rinbosari Dmitriy Medvedev xorijliklarning kirish va chiqish shartlarini, shuningdek, ularning mamlakat hududida bo‘lib turishini tartibga soluvchi “keng qamrovli qonun loyihasi” haqida oldindan e’lon qilgan edi. Xavfsizlik kengashining migratsiya masalalariga bag‘ishlangan majlisi sentabrda o‘tkazilishi rejalashtirilmoqda.
Izoh (0)