Қарши тумани ҳокими Зоир Алиқулов 2024 йилда Қарши туманида яшаган ва айни кунда хорижда меҳнат қилаётган 1783 нафар мигрант ёшлар Ватанга қайтарилишини ва уларнинг бандлиги таъминланишини маълум қилди.
Бу ҳақда “Дарё”га хабар берган ҳокимлик ахборот хизмати раҳбари Тўлқин Турдиевнинг маълумот беришича, ҳоким мазкур масалада ёшлар билан учрашувида гапирган.
Қайд этилишича, бугун Қарши тумани ҳокими Зоир Алиқулов бошчилигидаги сектор раҳбарлари ва туман ёшларининг учрашуви бўлиб ўтган.
2024 йилда хорижда меҳнат қилаётган 1783 нафар ёшларни Ватанга қайтариш ва уларни шу ерда банд қилиш чораларини кўрамиз. Келгуси уч йилликда туманни ёшлар учун ишсизликдан ҳоли ҳудудга айлантириш йўлида барча ҳаракатларни ишга соламиз, — деди туман ҳокими ёшлар билан мулоқот қилар экан.
Ҳокимнинг ёшларга билдиришича, туманда кейинги йилда асосий эътибор ёшларнинг хорижий тилларни ўрганиши ва ахборот технологияларини мукаммал ўзлаштиришига қаратилади.
Ҳар бир маҳаллада камида икки нафардан ёш дастурчиларни тайёрлаш йўлга қўйилади. “Хорижий тил билан ITга йўл” лойиҳаси доирасида 180 нафар ёшнинг хорижий тилларни ўқиш харажатлари қоплаб берилади. Туманимизда кейинги йилнинг биринчи ярим йиллигида қад ростлайдиган “Ёшлар маркази”да жуда катта IT маркази иш бошлайди. Бундан ташқари давлат кўмагига муҳтож оғир тоифадаги 25 нафар ёшнинг ижтимоий-иқтисодий масалаларини ҳал қилиш орқали ҳаёти яхшиланишига кўмак берилади. 1752 нафар ишсиз ёш ва 2261 нафар мактаб битирувчиларининг бандлиги таъминланади.
Шу билан биргаликда, хорижда меҳнат қилаётган 1783 нафар ёшларни Ватанга қайтариш ва шу ерда банд қилиш чоралари кўрилади. Ижтимоий кўмакка муҳтож 1327 нафар ёшга “Ёшлар дафтари” орқали ёрдам кўрсатилади. Айниқса, илм олишга ва китоб ўқиган ёшларни мунтазам равишда моддий-маънавий рағбатлантириб боришга алоҳида эътибор қаратилади, — деди туман ҳокими.
Ҳоким ва ёшлар мулоқоти давомида спортчилар, фаол ёшлар ва уларнинг ота-оналарини тақдирлаш маросими ҳам бўлиб ўтган.
Ёшларнинг чет тилларни ўрганишига, таълим олишига шароит яратиб берган ота-оналар келажак учун мустаҳкам пойдевор қурмоқда. Уларни дунёқараши кенг, ўрнак сифатида кўрсатиладиган инсонлар деб ҳисоблайман. Албатта, бундай ота-оналарни доимий тарзда рағбатлантириб боришга алоҳида эътибор қаратамиз, — деди Зоир Алиқулов.
Изоҳ (0)