Давлат хавфсизлик хизматининг Наманган вилояти бўйича бошқармаси ходимлари томонидан ўтказилган тезкор-қидирув тадбирлари натижасида Тошкент шаҳри, Андижон ва Наманган вилоятларидаги йирик савдогар ва тадбиркорларнинг жуда кўп миқдордаги хорижий валюталарини айланма йўллар орқали Қирғизистонга ўтказиш билан шуғулланиб келган жиноий гуруҳ фаолиятига чек қўйилди, деб хабар беради ЎзА.
Хусусан, Андижон шаҳрида яшовчи, 1998 ва 2002 йилларда туғилган икки нафар шахс 2023 йилнинг май ойида Тошкент шаҳрида жуда кўп миқдордаги чет эл валюталарини қабул қилиб олиб, уларни жиноий шерикларига етказиш учун Фарғона вилояти томон йўл олган.
Ёзёвон тумани ҳудудида улар ушбу хорижий валюталарни Қирғизистонга божхона назоратини четлаб, ўтказиши керак бўлган Қувасой шаҳрида яшовчи 24 ёшли фуқаро билан учрашган вақтларида Давлат хавфсизлик хизматининг Наманган вилояти бўйича бошқармаси ходимлари томонидан қўлга олинган.
Улар ҳаракатланиб келган Spark русумли автомашина холислар иштирокида кўздан кечирилганда, автомашина салонида 4 дона қора рангли полиэтилен пакетларга ўралиб, скотч билан маҳкамланган жами 590 минг 945 АҚШ доллари борлиги аниқланиб, ашёвий далил сифатида расмийлаштириб олинган.
Шунингдек, тезкор тадбир давом эттирилиб, жиноий гуруҳ етакчиси бўлган Қувасой шаҳрида яшовчи 42 ёшли шахс ҳам қўлга олинган.
Ҳолат юзасидан Давлат хавфсизлик хизматининг Наманган вилояти бўйича бошқармаси Тергов бўлими томонидан мазкур фуқароларга нисбатан Жиноят кодексининг 25, 182-моддасининг (божхона тўғрисидаги қонунчиликни бузиш) 2-қисми “а” банди билан жиноят иши қўзғатилиб, тергов ҳаракатлари олиб борилган.
Натижада, жиноят ишлари бўйича Наманган туман суди томонидан ушбу шахсларнинг икки нафарига нисбатан 5 йил, қолган икки нафарига нисбатан эса 5 йил 6 ой муддатга озодликдан маҳрум қилиш жазоси тайинланган.
Шунингдек, ашёвий далил сифатида олинган пуллар ва Spark русумли автомашина давлат эгалигига ўтказилган.
Изоҳ (0)