Ijtimoiy tarmoqlarda “Alfons” serialida Lobar rolini ijro etgan aktrisa Osiyo Inomovaning videomurojaati ko‘plab muhokamalarga sabab bo‘ldi.
— Ikki kun oldin ustimdan ariza tushgani uchun meni IIBga chaqirishdi. Arizaning kulgililigini qarangki, bir inson serialni ko‘rayotib, asabiylashganidan qon bosimi ko‘tarilib ketibdi. Dori-darmonga sharoiti yo‘q ekan. Serialda aynan meni ko‘rib asabiylashgani uchun uning dori-darmon pulini to‘lab berar ekanman. Bilmadim, bu qanday biznes, ammo menga o‘tmaydi. Ustimdan shikoyat qilib, pul undiraman deb o‘ylaganlar juda ham ko‘p. Har bittasiga olti million so‘mdan beraversam, uyimni qayerdan topaman, — deydi aktrisa videomurojaatida.
Bu video ijtimoiy tarmoqlarda keng muhokamalarga sabab bo‘ldi va aktrisani qora piar qilishga uringanlikda ayblashdi. Masalaga oydinlik kiritish maqsadida, “Daryo” muxbiri yosh aktrisa bilan bog‘landi.
— Bu voqeaga taxminan o‘n kunlar bo‘lib qoldi. Menga Mirobod tuman IIBdan qo‘ng‘iroq qilib, ustimdan ariza tushganligi va u yerga borishimni aytishdi. Borsam ikkinchi tomonni ham chaqirishgan ekan. Yoshi katta erkak meni ekranda ko‘rib asabiylashgani va dori-darmon sotib olish uchun unga pul berishim kerakligini aytdi. “Pul berolmayman, uzr”, dedim. Ichki ishlar xodimlari ketayotganimda “To‘g‘ri tushunasiz, tushgan har bir arizani o‘rganib, xalqning dardini eshitishimiz kerak”, dedi. Shundan keyin IIBga chaqirishgani yo‘q. Menimcha, u erkak arizasini qaytarib oldi, — deydi aktrisa Osiyo Inomova.
Toshkent shahar Ichki ishlar bosh boshqarmasi holatga quyidagicha munosabat bildirdi.
— Mazkur murojaat yuzasidan o‘tkazilgan o‘rganishlar jarayonida huquqbuzarlik alomatlari mavjud emasligi aniqlangan. Hech kim javobgarlikka tortilmagan. Ariza bilan murojaat qilgan fuqaro aktrisaga nisbatan daʼvosi yo‘qligini maʼlum qilgan, — deydi Toshkent shahar Ichki ishlar bosh boshqarmasi axborot xizmati katta mutaxassisi leytenant Jamoliddin Nasimov.
Izoh (0)