Aktyor Shohrux Hamdamov “Omon-omon” ko‘rsatuviga bergan intervyusida xonanda bo‘lolmagani, hind aktyori Shohrux Xon bilan uchrasholmagani va uni ranjitgan odamlar haqida gapirdi.
— Maktabni tamomlab, estrada va sirk kollejining xonandalik fakultetida o‘qishga kiraman deb borsam “Yo‘q, seni bu yo‘nalishda o‘qishga ololmaymiz”, deyishdi. Keyin bilsam xonandalik fakultetiga faqat sanʼat maktabini tamomlab kelganlarni olishar ekan. Shunda ustozim “Sen aktyorlikka topshir, ichida xonandalikni ham o‘rgatishadi”, degan. O‘shanda xohlamay hujjatlarimni drama fakultetiga topshirgandim. Uzoq vaqtgacha aktyorlik menga erish tuyulgan. Chunki mashg‘ulotlar davomida ustozlar suvarak yoki maymun bo‘lish vazifasini berishardi, o‘quvchilar bajarishi kerak edi. Bir yildan keyin bu sohaning ichiga kirib bordim va mashg‘ulotlarni kulib emas, jiddiy qabul qilishni boshladim.
Ammo menda teatrga qiziqish bo‘lmagan, boshidan kinoni tanlaganman. Rahmatli ustozimiz Rixsivoy Muhammadjonov syomkalarda teatr aktyoriga ko‘p tanbeh berardi. Keyinchalik bilsam teatr aktyorlarining xatti-harakatlarida bo‘rttirish bor ekan. Bu kadrda yaqqol sezilarkan. Shundan keyin teatrdan qochish kerak deb o‘ylaganman. Teatrni yaxshi ko‘raman, ammo kino alohida maktab. Shu bois teatrda ishlash niyatim umuman yo‘q, — deydi aktyor Shohrux Hamdamov.
Aktyor 2015-yili Hindistonda rejissorlik bo‘yicha tahsil olgani va hind aktyori Shohrux Xon bilan uchrashishga harakat qilgani haqida gapirdi.
— Hindistonga Shohrux Xonni ko‘rish uchun borgandim. Bolalikdan uning filmlarini ko‘rib katta bo‘lganman. O‘qishga borishdan asosiy maqsad ham u bilan uchrashish edi. Ammo uyini izlab borganimizda u Dubayga dam olish uchun ketgan ekan. Uyiga borganda ko‘rdim, men yolg‘iz emas ekanman. Hatto, Amerikadan ham uni ko‘rish uchun muxlislari kelgan ekan, — deydi aktyor.
Shohrux Hamdamov “Uch qahramon” filmini suratga olishda qanday qiyinchiliklarga uchragani va baʼzi insonlarning negativ fikrlari ko‘ngliga og‘ir botgani haqida gapirdi.
— Bu film uchun katta kuch sarflandi. Yo‘llar yopildi, kaskadyorlik ishlarini ham aktyorlarning o‘zi bajardi. Avariya sahnalarini olish uchun avtobuslar ag‘darilgani ham ko‘plab muhokamalarga sabab bo‘ldi. Yoz chillasida yonib filmni suratga olayotganimizda yo‘llar yopilganidan ranjigan odamlar “Shu kinoying kimga kerak”, deb yonimizdan so‘kinib o‘tib ketdi. Lekin shu inson kino bitganidan keyin o‘tirib ko‘radi. Ichimda “Agar shu inson kinoni ko‘rsa rozi emasman”, deb qo‘ydim, — deydi Shohrux Hamdamov.
Izoh (0)