Ўзбек томошабини “Альфонс” сериалини кўраётганида қон босими ошгани учун ушбу эпизодда роль ўйнаган актриса Осиё Иномова устидан ИИБга арз қилди

Ижтимоий тармоқларда “Альфонс” сериалида Лобар ролини ижро этган актриса Осиё Иномованинг видеомурожаати кўплаб муҳокамаларга сабаб бўлди.

— Икки кун олдин устимдан ариза тушгани учун мени ИИБга чақиришди. Аризанинг кулгилилигини қарангки, бир инсон сериални кўраётиб, асабийлашганидан қон босими кўтарилиб кетибди. Дори-дармонга шароити йўқ экан. Сериалда айнан мени кўриб асабийлашгани учун унинг дори-дармон пулини тўлаб берар эканман. Билмадим, бу қандай бизнес, аммо менга ўтмайди. Устимдан шикоят қилиб, пул ундираман деб ўйлаганлар жуда ҳам кўп. Ҳар биттасига олти миллион сўмдан бераверсам, уйимни қаердан топаман, — дейди актриса видеомурожаатида.

Бу видео ижтимоий тармоқларда кенг муҳокамаларга сабаб бўлди ва актрисани қора пиар қилишга уринганликда айблашди. Масалага ойдинлик киритиш мақсадида, “Дарё” мухбири ёш актриса билан боғланди.

— Бу воқеага тахминан ўн кунлар бўлиб қолди. Менга Миробод туман ИИБдан қўнғироқ қилиб, устимдан ариза тушганлиги ва у ерга боришимни айтишди. Борсам иккинчи томонни ҳам чақиришган экан. Ёши катта эркак мени экранда кўриб асабийлашгани ва дори-дармон сотиб олиш учун унга пул беришим кераклигини айтди. “Пул беролмайман, узр”, дедим. Ички ишлар ходимлари кетаётганимда “Тўғри тушунасиз, тушган ҳар бир аризани ўрганиб, халқнинг дардини эшитишимиз керак”, деди. Шундан кейин ИИБга чақиришгани йўқ. Менимча, у эркак аризасини қайтариб олди, — дейди актриса Осиё Иномова.

Тошкент шаҳар Ички ишлар бош бошқармаси ҳолатга қуйидагича муносабат билдирди.

— Мазкур мурожаат юзасидан ўтказилган ўрганишлар жараёнида ҳуқуқбузарлик аломатлари мавжуд эмаслиги аниқланган. Ҳеч ким жавобгарликка тортилмаган. Ариза билан мурожаат қилган фуқаро актрисага нисбатан даъвоси йўқлигини маълум қилган, — дейди Тошкент шаҳар Ички ишлар бош бошқармаси ахборот хизмати катта мутахассиси лейтенант Жамолиддин Насимов.