Qashqadaryodagi maktabda kaltaklangan o‘quvchi voqeasi boshqarma boshlig‘i nazoratiga olindi

Qashqadaryo viloyatining G‘uzor tumanidagi maktabda o‘quvchi o‘qituvchi tomonidan kaltaklangani ko‘ringan video tarqaldi. Mas’ullarning bildirishicha, kaltaklangan o‘quvchi voqeasi vazirlikning hududiy boshqarmasi boshlig‘i nazoratiga olingan. 

Holat Qashqadaryo viloyati Maktabgacha va maktab ta’limi boshqarmasi, viloyat IIB nazoratiga olingan. O‘rganishlar yakuni yuzasidan rasmiy munosabat bildirilishini ma’lum qilamiz, — deyiladi mas’ullarning bu haqdagi dastlabki ma’lumotida. 

Videodan anglashilishicha, kaltaklangan o‘quvchi boshlang‘ich sinfda tahsil oladi. O‘quvchisini kaltaklayotgan o‘qituvchi avvaliga sinfxonaga kimnidir taklif qilib, o‘quvchini aynan uning ko‘z o‘ngida kaltaklaydi. 

Zo‘ravon o‘qituvchi o‘quvchisiga kuch ishlatishi davomida yonidagi suhbatdoshiga nimanidir tushuntirishga uringanini ko‘rish mumkin.

Avvalroq Toshkentdagi maktabda o‘quvchi yigit sinfdoshlari tomonidan kaltaklanishi oqibatida operatsiya qilingani haqida xabar berilgandi.