Bugun, 20-dekbar kuni bo‘lib o‘tgan Oliy Majlis Senatining qirq sakkizinchi yalpi majlisida 2024-yil budjetida xususiy sektorda ishlovchi ayollarning homiladorlik va tug‘ish nafaqalari (dekret) miqdori qisqartirilishi muhokama qilindi.
Bu qisqartirish real hisob-kitoblar, ya’ni joriy yilgi o‘zlashtirish darajasini inobatga olgan holda belgilangan. Lekin toki budjet loyihasi e’lon qilingunga qadar xususiy sektorda ishlovchi ayollarning dekret puli bilan bog‘liq real holat tegishli idoralar tomonidan jamoatchilikka taqdim etilganini eslay olmaymiz. Masalan, Oila va xotin-qizlar qo‘mitasi ushbu masala bilan qiziqmagan.
Nega o‘zlashtirish kam bo‘lyapti, xususiy sektordagi ayollarimiz davlatning bu kafolatidan qanchalik xabardor, xususiy korxonalar bu masalaga qanday yondashyapti, degan savollar berilishi va mana shu savollar doirasida muhokamalar bo‘lib o‘tishi kerak edi. Lekin bu jarayon bo‘lgani yo‘q. Faqat yilning oxirida, keyingi yilgi budjet e’lon qilinganida savollar kelib tushmoqda. Vaholanki, mutasaddi vazirlik, idoralar bunga birinchi navbatda e’tibor qaratishlari kerak edi, — dedi Tanzila Norboyeva.
Senat raisining ta’kidlashicha, homiladorlik va tug‘ish nafaqalaridan ayollarning foydalanmayotgani mutasaddi tashkilotlarning bunga qiziqmayotgani, masalani davlat idoralari oldiga qo‘ymayotgani va xususiy korxonalar bilan ishlanmayotganini ko‘rsatadi.
Xususiy sektorda rasman ishlayotgan ayollarimiz bilib qo‘yishlari kerak, homiladorlik va tug‘ish nafaqalari bu — davlat kafolati va har qanday holatda ham to‘lab beriladi. Boshqacha talqinga o‘rin yo‘q. Bo‘lishi ham mumkin emas, — dedi Tanzila Norboyeva.
Avvalroq Tanzila Norboyeva keksalar, bolali ayollar, nogironligi bo‘lgan shaxslar yerusti piyoda o‘tish ko‘priklaridan foydalanganda qiynalayotgani, bundan norozi ekanligini aytib o‘tgan edi.
Izoh (0)