Toshkentdagi maktabda o‘quvchi yigit sinfdoshlari tomonidan kaltaklanishi oqibatida operatsiya qilindi

Toshkent shahar Yunusobod tumanidagi maktablarning birida o‘quvchi yigit o‘z sinfdoshlari tomonidan kaltaklanib, operatsiya qilingani aytilmoqda. 

Jabrlanuvchining so‘zlariga ko‘ra, voqea dars vaqtida sodir bo‘lgan. Uch sinfdoshi uni kaltaklagach, hushini yo‘qotgan. Suv sepib, hushiga keltirilganida esa unga shifokor chaqirilmagan ham. U shifokor chaqirib berishlarini iltimos qilgan. Shuningdek, maktab maʼmuriyati ham uning ustidan kulganini taʼkidlagan. 

“Maktabga bordim. 3-soat edi. Bir sinfdoshim kelib ustimdan kuldi va yuzimga shapaloq urdi. Ikkinchisi kelib, urdi va meni ushlab oldi. Uchinchisi orqamdan temir bilan urib tashladi. Keyin hushimni yo‘qotdi. Doktor chaqiring, desam chaqirib berishmadi. Keyin maktab maʼmuriyati ham chiqib, ustimdan kuldi. Erkaksan-ku, o‘zingni bosib ol, uydagilaringni chaqirmaymiz, shu yerda tuzatamiz seni, dedi. Operatsiya bo‘ldim, ko‘zimning tagida ham temirlar turibdi. Birortasi ham kelib hol-ahvol so‘ramadi”, — deydi jabrlanuvchi.

Kaltaklagani aytilgan yigitlar esa o‘zlari ham uning akalari tomonidan kaltaklanganini aytmoqda. Maktab maʼmuriyati ham holatga munosabat bildirdi. 

“Surishtirishimiz natijasida bir-birining o‘rniga o‘tirib olgani uchun joy talashishgani maʼlum bo‘ldi. Maktab jamoamiz ikkala tomonning ota-onalarini chaqirtirdik, profilaktik tushuntirish ishlari olib borildi. Kaltaklangan bola urushqoqlikka moyilligi bor bola emasdi. Uch marotaba borib xabar oldim”, — deydi maktab xodimi.

Holat yuzasidan shahar Ichki ishlar bosh boshqarmasi munosabat bildirdi. Unga ko‘ra, holat yuzasidan Yunusobod tumani Ichki ishlar organlari faoliyatini muvofiqlashtirish boshqarmasi tergov bo‘limi tomonidan Jinoyat kodeksining 105-moddasi bilan jinoyat ishi qo‘zg‘atilgan.