Yaponiya Mudofaa vazirligi mamlakat tarixida birinchi marta ayol kishiga Dengizda o‘zini o‘zi mudofaa qilish kuchlaridagi eng yuqori admiral unvonini berdi — 57 yoshli Natsue Kondo mahalliy bosh inspektor lavozimiga tayinlandi. Bu haqda NHK telekanali xabar berdi.
Mahalliy bosh inspektor Yaponiya bo‘ylab mudofaa va xavfsizlik uchun masʼul bo‘lgan mintaqaviy idoralardagi eng yuqori lavozim hisoblanadi. Bunday bo‘linmalar beshta nuqtada joylashgan bo‘lib, mudofaa xavfsizligi va tabiiy ofat oqibatlarini bartaraf etish, shuningdek, patrul kemalari va turli jihozlar yordamida Yaponiya chegarasi atrofidagi voqealarni kuzatish uchun masʼuldir.
Yaponiyaning dengizda o‘zini o‘zi mudofaa qilish kuchlari tashkil etilgan 1954-yildan buyon ayol kishi birinchi marta bunday yuksak unvon va lavozimga ega bo‘lmoqda.
Kondo 1966-yilda tug‘ilgan. Yamaguchi universitetining gumanitar fanlar (yapon tili va adabiyoti) fakultetini tamomlagan va maktabda yapon tili o‘qituvchisi bo‘lib ishlagan. Universitetni tugatgandan bir yil o‘tgach, u Yaponiyaning dengizda o‘zini o‘zi mudofaa qilish kuchlariga xizmatga kiradi.
Kondo kemada xizmat qilishni istagan, ammo ayollar uchun bunga sharoit yo‘q edi, shuning uchun u buxgalteriya hisobi va ta’minot bilan shug‘ullangan. 2016-yilda u admiral yordamchisi unvoniga munosib topilgan birinchi ayol bo‘ldi. Shundan so‘ng u Ominato harbiy-dengiz bazasi mintaqaviy bo‘linmasi shtab boshlig‘i va ofitserlar nomzodi maktabining direktori bo‘lib ishladi.
NHK telekanali ma’lumotlariga ko‘ra, Yaponiya Mudofaa vazirligi kelasi yilda yuqori martabali zobitlar orasida ayollar ulushini kamida 5 foizga oshirishni rejalashtirmoqda.
Izoh (0)