Markaziy bankning Bank nazorati qo‘mitasi 2023-yilning noyabr oyidagi yig‘ilishlarda 26 ta masala ko‘rilib, ularda tegishli qarorlar qabul qilindi, deb xabar beradi regulyator matbuot xizmati.
Ma’lum qilinishicha, ro‘yxatga olish va ruxsat berish yo‘nalishida 16 ta masala ko‘rib chiqilib, ularda kredit tashkilotlari ustaviga kiritilgan o‘zgartirishlarni ro‘yxatdan o‘tkazish (7 ta), auditorga malaka sertifikatini berish (5 ta) hamda tijorat banklari kuzatuv kengashi va boshqaruvi aʼzolari, shuningdek, muhim ahamiyatga ega xodimlarining nomzodlarini ko‘rib chiqish (4 ta) kabi masalalar o‘rin olgan.
Kredit tashkilotlarining moliyaviy holati bo‘yicha (10 ta masala) banklar va to‘lov tashkilotlari tomonidan Markaziy bankning prudensial meʼyorlari talablarining bajarilishi, banklar va mikromoliya tashkilotlarida o‘tkazilgan o‘rganishlar natijalari muhokama qilingan.
Xususan, Markaziy bank ko‘rsatmalariga amal qilmagani va makroprudensial vazifalar ijrosini o‘z vaqtida taʼminlamagani sababli 1 ta tijorat bankiga ayrim operatsiyalarni amalga oshirishga cheklovlar o‘rnatilgan. Markaziy bankka ishonchli bo‘lmagan maʼlumotlar taqdim qilganligi va Markaziy bankning meʼyoriy-huquqiy hujjatlari talablariga rioya qilinishi taʼminlanmaganligi uchun 4 ta bank va 2 ta mikromoliya tashkilotlari tegishli chora va sanksiyalar qo‘llanilishi to‘g‘risida ogohlantirilgan.
“Prudensial normativlarga rioya qilmaganligi oqibatida 4 ta bankka va aniqlangan qoidabuzarliklar uchun 1 ta to‘lov tizimi operatoriga nisbatan jarima choralari qo‘llanildi”, — deyiladi xabarda.
Bundan tashqari, qo‘mita tomonidan o‘zining tizim barqarorligini saqlash, omonatchilar va investorlar huquqlarini himoya qilish prinsipidan kelib chiqib, tijorat banklari boshqaruvlari zimmasiga aniqlangan kamchiliklarni tuzatish, ehtimoliy yo‘qotishlarga qarshi zaxiralar yaratish, o‘rnatilgan prudensial normativlarga amal qilish, bank faoliyatida mavjud zaifliklarni bartaraf qilish va moliyaviy holatini sog‘lomlashtirishga qaratilgan talablarga rioya etish yuzasidan tegishli ko‘rsatmalar berilgan.
Eslatib o‘tamiz, 2022-yilda 26 ta bankdan 3,8 milliard so‘m miqdorida jarimalar undirilgan. Tekshiruvlar davomida qariyb 39 mingta mijozning jami 37 trillion so‘mlik kreditlari yoki ushbu banklar jami kredit portfelining 58 foizi qamrab olingan.
Izoh (0)