O‘zbekistonda bank kartalari bilan bog‘liq shubhali operatsiyalar sodir etilganda ulardan foydalanish 3 kungacha cheklanishi mumkin.
Bu haqda “Raqamli mahsulotlar (xizmatlar) iste’molchilari huquqlarini himoya qilish va raqamli texnologiyalar vositasida sodir etiladigan huquqbuzarliklarga qarshi kurashishni kuchaytirish choralari to‘g‘risida”gi prezident qarorida belgilandi.
Unda aytilishicha, o‘g‘rilik, firibgarlikka chek qo‘yish uchun Markaziy bankka tijorat banklari, to‘lov tizimi operatorlari va to‘lov tashkilotlariga bank kartalari bilan bog‘liq shubhali operatsiyalar sodir etilganda, bank kartalari, bank hisobvaraqlari va mobil ilovalardagi hisobvaraqlardan foydalanishni 3 kungacha cheklash to‘g‘risida majburiy ko‘rsatmalar berish vakolati berildi.
Shuningdek, bir oy muddatda tijorat banklari, to‘lov tizimi operatorlari va to‘lov tashkilotlari tomonidan fuqarolarga onlayn xizmatlar ko‘rsatishda texnik himoya usullarini takomillashtirish bo‘yicha kompleks chora-tadbirlar ishlab chiqish yuklatildi.
Zamonaviy tahdidlar, bank kartalari (karta rekvizitlari) bilan, shu jumladan elektron to‘lov tizimlari orqali noqonuniy operatsiyalarning oldini olish uchun aholining raqamli moliyaviy savodxonligini oshirish bo‘yicha kompleks chora-tadbirlar ishlab chiqib, tasdiqlash ham yuklatildi.
Izoh (0)