Mamlakatda 2024–2040-yillarda doimiy aholi sonining yillik o‘sishi surʼati o‘rtacha 1,7 foizga sekinlab, 2040-yilda 48 million kishiga yetishi kutilmoqda. Bu haqda Makroiqtisodiy va hududiy tadqiqotlar institutining ko‘chmas mulk va ipoteka bozori hisobotida yozilgan.
Institut hisob-kitoblariga ko‘ra, aholi sonining 1 foizga o‘sishi uy-joyga bo‘lgan talabning 0,8 foizga oshishiga olib keladi.
“2023-yil 1-yanvar holatiga O‘zbekistonda doimiy aholi soni 36 million kishiga yetib, 2010-yilga nisbatan 8 million kishiga (28,7 foizga) oshdi. Ushbu davrda aholi soni yiliga o‘rtacha 2 foizga yoki 600 ming kishiga ko‘paydi. 2024–2040-yillarda doimiy aholi soni yillik o‘sishi surʼati o‘rtacha 1,7 foizga sekinlab, 2040-yilga borib 48 million kishiga yetishi kutilmoqda”, — deyiladi hisobotda.
Prognoz qilinishicha, 2024–2040-yillarda Qashqadaryo va Samarqand viloyatlarida aholi soni 1,5 million kishiga ko‘payishi kutilmoqda. Farg‘ona vodiysi viloyatlari aholisi soni 2040-yilga borib salkam 14 million kishiga yetishi va 2023-yil 1-yanvar holatiga nisbatan 3,6 million kishiga ko‘payishi mumkin.
Avvalroq Statistika agentligi 2023-yilning 1-oktabr holatiga O‘zbekistonning doimiy aholisi soni 36,6 million kishiga yetganini xabar qilgandi.
Izoh (0)