O‘zbekistonda prokuratura organlari tomonidan yoqilg‘i-energiya resurslaridan noqonuniy foydalanish bilan bog‘liq holatlarni fosh etishga qaratilgan nazorat tadbirlari davom etmoqda, deb xabar beradi Bosh prokuratura matbuot xizmati.
Ma’lum qilinishicha, “Samarqandshahargaz” gaz taʼminot bo‘limi mansabdor shaxslari mansab vakolatlarini suiisteʼmol qilib sharoit yaratib bergani natijasida, Samarqand shahridagi “S.N” MCHJ rahbari A.M. va “X.S” MCHJ jamiyatga qarashli to‘yxonadagi gaz jihozlari tabiiy gaz tarmog‘iga o‘zboshimchalik bilan ulangan, Buning oqibatida jami 512,4 ming metr kub 768,6 million so‘mlik tabiiy gaz o‘g‘irlangani aniqlangan.
Mazkur holat yuzasidan “S.N” MCHJ rahbari A.M va “X.S” MCHJ mansabdor shaxslariga Jinoyat kodeksining 169-moddasi (o‘g‘rilik) va “Samarqandshahargaz” gaz taʼminot bo‘limi mansabdor shaxslariga Jinoyat kodeksining 205-moddasi (hokimiyat yoki mansab vakolatini suiiste’mol qilish) va boshqa moddalar bilan jinoyat ishi qo‘zg‘atilgan.
Bundan oldin Toshkent va Andijon viloyatlarida ohak ishlab chiqarish sexi va issiqxona gazdan noqonuniy foydalanishi natijasida tizimga 876 million so‘m zarar yetkazgani to‘g‘risida xabar berilgandi. Shuningdek, O‘zbekistonda yil boshidan buyon huquq-tartibot organlari tomonidan o‘tkazilgan nazorat tadbirlarida 26 ta noqonuniy mayning ferma fosh qilingan.
Izoh (0)