Ўзбекистонда прокуратура органлари томонидан ёқилғи-энергия ресурсларидан ноқонуний фойдаланиш билан боғлиқ ҳолатларни фош этишга қаратилган назорат тадбирлари давом этмоқда, деб хабар беради Бош прокуратура матбуот хизмати.
Маълум қилинишича, “Самарқандшаҳаргаз” газ таъминот бўлими мансабдор шахслари мансаб ваколатларини суиистеъмол қилиб шароит яратиб бергани натижасида, Самарқанд шаҳридаги “С.Н” МЧЖ раҳбари А.М. ва “Х.С” МЧЖ жамиятга қарашли тўйхонадаги газ жиҳозлари табиий газ тармоғига ўзбошимчалик билан уланган, Бунинг оқибатида жами 512,4 минг метр куб 768,6 миллион сўмлик табиий газ ўғирлангани аниқланган.
Мазкур ҳолат юзасидан “С.Н” МЧЖ раҳбари А.М ва “Х.С” МЧЖ мансабдор шахсларига Жиноят кодексининг 169-моддаси (ўғрилик) ва “Самарқандшаҳаргаз” газ таъминот бўлими мансабдор шахсларига Жиноят кодексининг 205-моддаси (ҳокимият ёки мансаб ваколатини суиистеъмол қилиш) ва бошқа моддалар билан жиноят иши қўзғатилган.
Бундан олдин Тошкент ва Андижон вилоятларида оҳак ишлаб чиқариш цехи ва иссиқхона газдан ноқонуний фойдаланиши натижасида тизимга 876 миллион сўм зарар етказгани тўғрисида хабар берилганди. Шунингдек, Ўзбекистонда йил бошидан буён ҳуқуқ-тартибот органлари томонидан ўтказилган назорат тадбирларида 26 та ноқонуний майнинг ферма фош қилинган.
Изоҳ (0)