Uzbekistan’s Club “O‘zbekistonlik.Students” maxsus loyihasining uchinchi epizodini taqdim etdi.
16-dekabr kuni soat 17:00 da YouTube’dagi rasmiy kanal va MY5 telekanalida “O‘zbekistonlik.Students” maxsus loyihasining uchinchi epizodining milliy premyerasi bo‘lib o‘tdi. Unda tomoshabin yangi qahramonlar bilan tanishadi, ularning hikoyalari, shubhasiz, tomoshabinlarni ilhomlantirishga qodir. Yangi qahramonlar orasida jahon reytingida 58-o‘rinni egallab turgan Bristol universiteti talabasi Azima Toirova ham bor. Azima neyroilm va ta’lim sohasida mutaxassis bo‘lib, bu sohalarda o‘ziga xos istiqbolini namoyish etib kelmoqda.
U bilan birgalikda loyihada dunyoning top 350 ta eng yaxshi universitetlari qatoridan joy olgan Angliya Ruskin universiteti talabasi Nodirbek Qahramonov haqida ham hikoya qilinadi. Nodirbek xalqaro biznes va menejmentni o‘rganib kelmoqda va bu sohalarda o‘zi uchun yangi qirralarni ochmoqda.
Qayd etish joizki, mazkur loyihani amalga oshirishda Yoshlar agentligi, shuningdek, doimiy hamkorlar — Ucell va Turin politexnika universiteti katta yordam ko‘rsatib kelmoqda. Va, albatta, loyihaning “qanotlari” Uzbekistan Airways’dir.
Eslatib o‘tamiz, Uzbekistan’s Club — butun dunyodagi o‘zbekistonlik muvaffaqiyatga erishgan yoshlarni birlashtirish, shuningdek, o‘zbekistonliklar imijini zamonaviy, mehnatsevar va intellektual salohiyati yuqori millat sifatida targ‘ib qilish uchun yaratilgan global maydon.
Izoh (0)