Kuvaytning sobiq valiahd shahzodasi shayx Meshal al-Ahmad al-Jobir as-Saboh mamlakatning yangi amiri etib tayinlandi. Bu haqda Anadolu xabar berdi.
Kuvayt Vazirlar Mahkamasi bayonotida 83 yoshli shayx Meshal mamlakatning yangi amiri etib rasman e’lon qilindi. Kuvayt konstitutsiyaviy qoidalariga ko‘ra, valiahd shahzoda navbati kelganda hokimiyat jilovini o‘z qo‘liga oladi. Yangi amir 86 yoshida vafot etgan shayx Navaf al-Ahmad as-Saboh o‘rniga tayinlandi.
Marhum amir 17-dekabr kuni faqat yaqin qarindoshlari ishtirok etadigan marosimda dafn etiladi. Marosimlar Kuvayt shahridagi Bilol ibn Raboh masjidida bo‘lib o‘tadi. 18 va 19-dekabr kunlari Bayan saroyida yangi amir va qirollik oilasi hamdardlikni qabul qiladi.
Kuvayt hukumati ham rasmiy bayonotida amirning vafoti munosabati bilan hamdardlik bildirib, 40 kunlik motam va rasmiy muassasalar uch kunga yopilishini e’lon qildi. Kuvayt valiahd shahzodasi saytida yozilishicha, shayx Meshal al-Ahmad al-Jobir as-Saboh 1940-yilda tug‘ilgan.
Izoh (0)