Eron Vazirlar Mahkamasi bir tomonlama tartibda 32 davlat bilan viza rejimini bekor qilishni ma’qulladi. Bu haqda mamlakat madaniy meros, hunarmandchilik va turizm vaziri Izzatulloh Zarg‘amiy ma’lum qildi, deb xabar beradi “Irna” agentligi.
Eron vazirining so‘zlariga ko‘ra, mamlakat butun dunyoga eshiklarini ochmoqchi.
Viza rejimi bekor qilingan mamlakatlar orasida O‘zbekiston ham bor. Shuningdek, ro‘yxatdan BAA, Saudiya Arabistoni, Bahrayn, Peru, Kuba, Meksika, Venesuela, Bosniya va Gersegovina, Serbiya, Xorvatiya, Belarus va boshqa davlatlar o‘rin olgan.
“Eron dunyo, odamlar bilan muloqot qilmoqchi, eronofobiya bilan kurashmoqchi. Viza rejimining bir tomonlama bekor qilinishi Eronga bemalol keladigan chet el fuqarolari bilan muloqot qilish uchun imkoniyatdir”, — deydi Zarg‘amiy.
Eslatib o‘tamiz, 2022-yilning oktyabridan O‘zbekiston—Eron o‘rtasida ishbilarmon va ilmiy doiralar vakillari hamda sayyohlik guruhlari uchun soddalashtirilgan viza rejimi joriy etilgan. 2023-yilning oktyabrida esa Eron 60 ta mamlakat fuqarolari uchun viza tartibini yengillashtirish, jumladan, viza tartibini bir tomonlama bekor qilish imkoniyatini ko‘rib chiqayotgani to‘g‘risida xabar berilgandi.
Izoh (0)