Eron O‘zbekiston fuqarolari uchun vizasiz rejim joriy qilmoqchi

Eron O‘zbekistonga viza rejimini bekor qilish bo‘yicha kelishuv tuzishni taklif qildi, deb xabar bermoqda Eronning Teheran Times nashri.

Eron turizm vaziri Izzatulloh Zarg‘amiy Samarqandda bo‘lib o‘tgan Xalqaro turizm forumi doirasida ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov bilan uchrashuvida ikki tomonlama hamkorlik masalalarini muhokama qilgan. Xususan, ikki davlat o‘rtasida viza rejimini bekor qilishni taklif qilgan.

“Buxoroga tashrif buyurganimda bu ikki xalq qanchalik yaqin ekanini his qildim. Biz o‘zbekistonlik sayyohlarning Eronga kelishini qo‘llab-quvvatlaymiz, shuningdek, xorijga sayohat qilishni rejalashtirayotgan eronlik sayyohlar uchun O‘zbekiston ham ustunlikka ega bo‘lishi kerak, deb hisoblaymiz”, — degan u.

Shuningdek, Zarg‘amiy o‘zaro turizmni rivojlantirish uchun mamlakatlar quruqlikdagi sayohatni rivojlantirish zarurligini ta’kidladi. Bunga erishish uchun Turkmaniston bilan hamkorlik qilish ko‘zda tutilmoqda.

Eron 60 ta mamlakat fuqarolari uchun viza tartibini yengillashtirish, jumladan, viza tartibini bir tomonlama bekor qilish imkoniyatini ko‘rib chiqmoqda.

2022-yilning oktyabridan O‘zbekiston—Eron o‘rtasida ishbilarmon va ilmiy doiralar vakillari hamda sayyohlik guruhlari uchun soddalashtirilgan viza rejimi joriy etilgandi.