Enter Engeneering kompaniyasi kechikayotgan maoshini talab qilgan xodimlarini ishdan bo‘shatishni boshladi. Bu haqda “Daryo”ga to‘rt oydan buyon maosh olmagani sabab pulini talab qilgani uchun ariza yozdirilib, ishdan olingan xodim ma’lum qildi.
Ishchining ma’lumot berishicha, u kompaniyaning Boysun tumanidagi Boysun gazni qayta ishlash zavodida faoliyat yuritgan.
Ishxonadan oylik so‘rab, Telegram’dagi guruhga yozgandim. Guruhdagilarga boshliqlardan kechikayotgan oyligimizni so‘raylik, borib haqimizni talab qilaylik deb, yozgandim. Buni ko‘rib qolgan boshliqlar “o‘zimizning nomimizdan hech qanday e’tirozimiz yo‘q, o‘z xohishimiz bilan bo‘shayapmiz” deb, ariza yozdirib olishdi. Va ishdan bo‘shatib yuborishdi, — deydi ishdan haydalganini aytgan xodim.
“Daryo”ga aloqaga chiqqan yana bir xodimning ma’lum qilishicha, kecha, 12-dekabr kuni ish avvalida rahbariyat ofisi oldida yig‘ilgan yuzlab ishchi kechikayotgan maoshini talab qilgan.
Tahririyatga yuborilgan videolarda ta’kidlanishicha, Boysundagi zavod ishchilari ish tashlashga ham uringan.
Mana Boysundagi zavodda ish tashlash bo‘lyapti. Ish tashlaymiz, oylik yo‘q, oylik qani, — deydi rahbariyat joylashgan ofis oldida ko‘rinish bergan ishchilar.
“Daryo”ga video yuborgan yana bir ishchining bildirishicha, zavod xodimlarining talabidan so‘ng, rahbariyat vakillari ular bilan uchrashgan va ishchilar maoshi qachon berilishiga qisman oydinlik kiritgan.
“Cho‘ntagimizga qarab beramiz”, — deydi holatdan norozi mas’ul. Va uning bu gapini tasvirga olayotgan ishchiga e’tiroz bildirib, “o‘chir telefoningni”, deya qo‘shimcha qiladi.
Faoliyatini 2012-yilda boshlab, “Eng taraqqiy etayotgan kompaniyalardan biri” deya o‘ziga ta’rif bergan Enter Engineering kompaniyasi minglab ishchilariga uch-to‘rt oydan buyon maosh bermayotgani xabar qilingandi.
Kompaniya mas’uli “Daryo”ning ishchilar maoshi o‘z vaqtida berilmasligi sababini bilishga qiziqqanida, savolga hech qanday izoh bermagandi. Mazkur muammoga Kambag‘allikni qisqartirish va bandlik vazirligi ham e’tibor qaratgan. Ammo hozircha, vazirlik mas’ullari ham bu borada ma’lumot bermadi.
Izoh (0)