Enter Engineering компанияси кечикаётган маошини талаб қилган ишчиларини бўшатишни бошлагани ҳақида хабар берилганди. Мазкур масала жамоатчиликка очиқлангач, компания ишчиларига маош берила бошланди. Бу ҳақда “Дарё”га маош ола бошлаган ишчилар хабар берди.
Ишчиларнинг маълумот беришича, берилаётган маош ноябрь ойи учун аванс пуллари бўлиши мумкин.
Ўзимиз ҳам аниғини билмаймиз, шунақа ҳаққимизни талаб қилиб, офисга борсак, тинчланиб туришсин дейишадими, арзимаган 1,5 миллион сўмдан 1,7 миллион сўмгача пластик карточкага пул бериб қўйишади. Лекин ойликни тўлиқ ололмаймиз, — дейди исми сир қолишини сўраган ишчи.
Кеча, 12 декабрь куни компаниянинг Бойсун туманидаги Бойсун газни қайта ишлаш заводида фаолият юритаётган юзлаб ишчилар раҳбариятга мурожаат қилиб, маошини талаб қилганди.
Ишхонадан ойлик сўраб, Telegram’даги гуруҳга ёзгандим. Гуруҳдагиларга бошлиқлардан кечикаётган ойлигимизни сўрайлик, бориб ҳаққимизни талаб қилайлик деб, ёзгандим. Буни кўриб қолган бошлиқлар ўзимизнинг номимиздан ҳеч қандай эътирозимиз йўқ, ўз хоҳишимиз билан бўшаяпмиз деб, ариза ёздириб олишди. Ва ишдан бўшатиб юборишди, — дейди ишдан ҳайдалганини айтган ходим.
Таҳририятга юборилган видеоларда таъкидланишича, раҳбарияти билан кўришган ишчилар “Иш ташлаймиз, ойлик йўқ, ойлик қани?”, — дея савол берган.
“Дарё”га видео юборган яна бир ишчининг билдиришича, завод ходимларининг талабидан сўнг, раҳбарият вакиллари улар билан учрашган ва ишчилар маоши қачон берилишига қисман ойдинлик киритган.
“Чўнтагимизга қараб берамиз”, — дейди ҳолатдан норози масъул. Ва унинг бу гапини тасвирга олаётган ишчига эътироз билдириб, “ўчир телефонингни”, дея қўшимча қилади.
Фаолиятини 2012 йилда бошлаб, “Энг тараққий этаётган компаниялардан бири” дея ўзига таъриф берган Enter Engineering компанияси минглаб ишчиларига уч-тўрт ойдан буён маош бермаётгани хабар қилинганди.
Компания масъули “Дарё”нинг ишчилар маоши ўз вақтида берилмаслиги сабабини билишга қизиққанида, саволга ҳеч қандай изоҳ бермаганди. Мазкур муаммога Камбағалликни қисқартириш ва бандлик вазирлиги ҳам эътибор қаратган. Аммо ҳозирча вазирлик масъуллари ҳам бу борада маълумот бермади.
Изоҳ (0)