30-noyabr kuni dunyodagi eng keksa jonivor — toshbaqa Jonatan 191 yoshga to‘ldi. Uning taxminan 1832-yilda tug‘ilgani aytiladi. U 1882-yilda Seyshel orollaridan Muqaddas Yelena oroliga olib kelingan.
Jonatan turidagi toshbaqalarning o‘rtacha umri 150 yilni tashkil qiladi. Uning yoshi allaqachon bu yoshdan oshgan. Toshbaqa dunyo tarixidagi eng keksasi bo‘lib, unga bu nom 2021-yilda 188 yoshga kirgan Tui Maliladan meros qolgan.
Veterinar Jo Hollinsning so‘zlariga ko‘ra, Jonatan hali ancha sog‘lom. U hid bilishni yo‘qotgan va deyarli ko‘r bo‘lishiga qaramay, ishtahasi yaxshi. Haftada bir marta vitaminlarga boy meva va sabzavotlar bilan oziqlantiriladi. Bu nafaqat uning kaloriyalarini to‘ldiradi, balki metabolizmi uchun zarur omillarni taʼminlaydi.
Jonatan 141 yil oldin orolga kelganidan beri Muqaddas Yelena oroli gubernatorining qarorgohida yashaydi.
Jonatanning odatiy kuni juda zerikarli. U quyoshni yaxshi ko‘radi, lekin jazirama kunlarda soyaga o‘tadi. Unchalik issiq bo‘lmagan paytlarda quyoshda toblanishni yaxshi ko‘radi. Qishning sovuq kunlarida esa barglar yoki o‘tga ko‘miladi va kun bo‘yi o‘sha yerda qoladi.
Jonatan bilan yana uchta yirik toshbaqa yashaydi. Ularning ikkitasi 1969-yilda olib kelingan bo‘lib, taxminan 55 yoshda. Ular bilan yashaydigan yana bir toshbaqaning yoshi 32 da.
Jonatanning sevimli taomlari — karam, bodring, sabzi, olma va boshqa mavsumiy mevalar. U, ayniqsa, bananni yaxshi ko‘radi.
Izoh (0)