Farg‘onada 83 dona toshbaqalarni qo‘shni davlatga olib chiqib ketmoqchi bo‘lgan shaxs qo‘lga olindi, deb xabar beradi Davlat bojxona qo‘mitasi matbuot xizmati.
Qayd etilishicha, “Farg‘ona” chegara bojxona posti xodimlari DXX Chegara qo‘shinlari xodimlari bilan hamkorlikda post orqali qo‘shni davlatga chiqib ketish uchun harakatlangan Damas avtomashinasini belgilangan tartibda xolislar ishtirokida ko‘zdan kechirgan.
Ko‘zdan kechirish natijasida, avtotransport vositasining salonida konteynerda hayvonlarni tashish qoidalariga zid ravishda joylangan, tegishli hujjatlari bo‘lmagan 83 dona toshbaqa borligi aniqlandi.
Mazkur toshbaqalar Farg‘ona hayvonot bog‘i mutaxassislari ishtirokida ko‘zdan kechirilganida O‘zbekiston “Qizil kitobi”ga kamayib borayotgan tur sifatida kiritilgan O‘rta Osiyo cho‘l toshbaqasi ekani va 5 donasi noto‘g‘ri tashilgani sababli zararlanganligi maʼlum bo‘lgan va tibbiy muolajalar ko‘rsatilgan.
Sudning yakuniy qarori chiqqunga qadar toshbaqalar vaqtincha saqlash uchun hayvonot bog‘iga topshirilgan. Hozirda mazkur holat yuzasidan surishtiruv harakatlari olib borilmoqda.
Eslatib o‘tamiz, 2021-yilda Qashqadaryo viloyat Chiroqchi tumani “Umakay” YPX maskanida to‘xtatilgan avtomashinada toshbaqalar tabiiy muhitdan noqonuniy yig‘ib-terilib, olib ketilayotgani aniqlangan edi.
Izoh (0)