Rossiya Markaziy banki 25-dekabrdan boshlab Apple uskunalarini xarid qilish va undan rasmiy maqsadlarda foydalanishga taqiq joriy qiladi. Bu haqda Markaziy bank raisi Elvira Nabiullinaning buyrug‘iga asoslanib, “RIA Novosti” xabar berdi.
Hujjatga ko‘ra, bank xodimlariga ish joyida ham Apple telefonlari, ham planshetlaridan foydalanish taqiqlanadi. Markaziy bankning o‘zi bu maʼlumotga hali rasman izoh bermagan. Bungacha Rossiyaning bir qancha vazirlik va korporatsiyalari Apple texnologiyasidan voz kechishini e’lon qilgan edi. Sanoat va savdo vazirligi, Raqamli rivojlanish vazirligi, Energetika vazirligi, Moliya vazirligi, Transport vazirligi, “Rostex”, “Rosatom”, “Rosaviatsiya”, Rossiya temir yo‘llari shular jumlasidandir.
“Kreml, shuningdek, iPhone’lardan rasmiy maqsadlarda foydalanishni ham taqiqlaydi”, — degan edi Rossiya prezidenti matbuot kotibi Dmitriy Peskov.
2023-yil 1-iyun kuni Federal xavfsizlik xizmati ayrim rossiyalik foydalanuvchilarning iPhone’larini viruslar bilan zararlash bo‘yicha “Amerika razvedka agentliklarining razvedka kampaniyasi”ni aniqlaganini bildirgan.
Bunga javoban Apple hech qachon kompaniya mahsulotlariga viruslar kiritish bo‘yicha hech qanday hukumat bilan ishlamaganini va kelajakda bunday qilishni rejalashtirmayotganini ma’lum qilgan.
Izoh (0)