Россия Марказий банки 25 декабрдан бошлаб Apple ускуналарини харид қилиш ва ундан расмий мақсадларда фойдаланишга тақиқ жорий қилади. Бу ҳақда Марказий банк раиси Элвира Набиуллинанинг буйруғига асосланиб, “РИА Новости” хабар берди.
Ҳужжатга кўра, банк ходимларига иш жойида ҳам Apple телефонлари, ҳам планшетларидан фойдаланиш тақиқланади. Марказий банкнинг ўзи бу маълумотга ҳали расман изоҳ бермаган. Бунгача Россиянинг бир қанча вазирлик ва корпорациялари Apple технологиясидан воз кечишини эълон қилган эди. Саноат ва савдо вазирлиги, Рақамли ривожланиш вазирлиги, Энергетика вазирлиги, Молия вазирлиги, Транспорт вазирлиги, “Ростех”, “Росатом”, “Росавиация”, Россия темир йўллари шулар жумласидандир.
“Кремль, шунингдек, iPhone’лардан расмий мақсадларда фойдаланишни ҳам тақиқлайди”, — деган эди Россия президенти матбуот котиби Дмитрий Песков.
2023 йил 1 июнь куни Федерал хавфсизлик хизмати айрим россиялик фойдаланувчиларнинг iPhone’ларини вируслар билан зарарлаш бўйича “Америка разведка агентликларининг разведка кампанияси”ни аниқлаганини билдирган.
Бунга жавобан Apple ҳеч қачон компания маҳсулотларига вируслар киритиш бўйича ҳеч қандай ҳукумат билан ишламаганини ва келажакда бундай қилишни режалаштирмаётганини маълум қилган.
Изоҳ (0)