Йил бошидан бери Ҳиндистон деярли ҳар куни табиий офатларга дуч келмоқда

Йил бошидан буён табиий ва кутилмаган офатлар Ҳиндистоннинг турли ҳудудларига деярли ҳар куни ўз таъсирини ўтказмоқда, деб ёзади “ТАСС”.

Қайд этилишича, Ҳиндистонда 2023 йилнинг январидан сентябрига қадар ўтган кунларнинг 86 фоизида экстремал об-ҳаво шароити кузатилган.

“Оқибатда 2 923 киши ҳалок бўлди, қарийб 2 миллион гектар майдон ва 80 минг уй вайрон бўлди, 92 мингдан ортиқ ҳайвонлар нобуд бўлди”, — дейилади хабарда.

Энг кўп экстремал об-ҳаво ҳодисалари Мадҳя-Прадеш штатида қайд этилган – 138 та. Ўлим ҳолатлари энг кўп Бихар (642), Ҳимачал-Прадеш (365) ва Уттар-Прадеш (341) штатларида кузатилган.

Мамлакатда энг кенг тарқалган табиий офатлар кучли момақалдироқ ва бўронлар бўлиб, улар йилнинг 273 кунидан 176 кунида кузатилган ва 711 кишининг ўлимига сабаб бўлган. Кучли ёмғир, сув тошқини ва кўчкилар эса Ҳиндистонга энг катта зарар келтириб, 1 900 дан ортиқ одамнинг ҳаётига зомин бўлди.