Toshkent shahar Mirzo Ulug‘bek tumanida 24-may kuni ko‘p qavatli uydagi xonadon balkoniga ilingan Ukraina bayrog‘i maxsus kran orqali olib tashlangani xabar qilingandi. Shahar Ichki ishlar bosh boshqarmasi matbuot xizmati “Daryo”ga holat yuzasidan izoh berdi.
Xonadon egasining aytishicha, o‘sha kuni u mamlakatda bo‘lmagan. Holat sodir bo‘lishidan bir necha soat avval o‘zini Mirzo Ulug‘bek tumani IIB xodimi Murod deb tanishtirgan shaxs qo‘ng‘iroq qilib, xonadonda bo‘lgan bayroq olib tashlanishini aytgan. Sababi so‘ralganda esa “Kelsangiz, tushuntiramiz, bizda olib tashlashga buyruq bor”, deya javob bergan.
“Daryo” o‘zini IIB jinoyat-qidiruv bo‘limidan deb tanishtirgan shaxs rostdan ham ichki ishlar xodimi ekani hamda unga buyruq kim tomonidan, nima maqsadda berilganiga aniqlik kiritish maqsadida Toshkent shahar Ichki ishlar bosh boshqarmasi matbuot xizmati rahbari Nilufar Madiyeva bilan bog‘landi.
Uning aytishicha, xonadon egasiga xodimlarning harakatidan norozi bo‘lgan taqdirda, tegishli organlarga shikoyat qilish bo‘yicha tushuntirish berilgan:
“Fuqaroga tushuntirdik, agar ichki ishlar organlari xodimlarining harakatidan norozi bo‘lsa, yuqori turuvchi organlarga, xususan, prokuraturaga shikoyat bilan murojaat qilishi mumkin”.
Muxbirning “Bayroqni olib tashlash bo‘yicha buyruqni kim, nima uchun bergan edi?”, degan savoliga javob berilmadi.
“Bu talab qonuniy yoki noqonuniy bo‘lganini biz hal qilmaymiz, xodimlarning harakatiga prokuratura baho beradi. Fuqaro shikoyat bilan murojaat qilsa, shunda tekshiruv o‘tkaziladi”, — deya aytib o‘tdi Nilufar Madiyeva.
Yurist bloger Bahodir Ahmedovning yozishicha, fuqarolarning erkinligini cheklash IIB xodimlarining xizmat intizomi buzilishiga olib keladi.
“Ukraina bayrog‘ini ilishga birorta qonuniy taqiq bormi? Aniq normativ-huquqiy hujjatning aniq normasi... Fuqarolarning huquq va erkinligini buzish esa IIB xodimi tomonidan PQ-10 Ichki ishlar organlari xodimlarining kasbiy madaniyat va xizmat intizomi kodeksi 54-bandiga asosan intizomni qo‘pol ravishda buzishdir.
Ukraina bayrog‘i — bu urushga qarshi protest. Aksincha bo‘lsa javobgarlik bo‘lardi — urushni targ‘ib qilish jinoyat (JK 150-modda). Ukraina bu bir xalqaro huquq subyekti bo‘lgan davlat. Uning bayrog‘ini ilishda noto‘g‘ri narsa ko‘rmayapman”, — deya ta’kidlagan u.
Izoh (0)