MIB Namangan viloyat boshqarmasi tomonidan o‘tkazilgan tadbir davomida masʼuliyati cheklangan jamiyatlardan biriga qarashli avtomobil soliq qarzdorligi evaziga xatlandi. Bu haqda “Daryo” muxbiri Azizbek Abduvaliyev xabar bermoqda.
Viloyat soliq boshqarmasi qaroriga ko‘ra mazkur jamiyatdan jami 730,6 million so‘m soliq qarzdorligi undirish belgilangandi. Mazkur hujjat byuroning Yangi Namangan tumani bo‘limi ish yurituviga olingan va qarzdor jamiyatga soliq majburiyatini bajarishi uchun ixtiyoriy muddat berilgandi. Biroq jamiyat mutasaddilari qarzdorlikni bartaraf etmagan.
Shundan so‘ng majburiy ijro harakatlari olib borilgan va 447,9 million so‘m undirilib, qarzdorlik uchun yo‘naltirilgan. Qolgan summa to‘lanmaganligi sababli Trailblazer rusumli avtomobil xatlanib, jarima maydoniga tortildi.
Maʼlumot uchun, joriy yil 10 oy davomida MIB tomonidan soliq qarzdorligini undirish bilan bog‘liq 1 trillion so‘mdan ortiq ijro hujjatlari tamomlandi, shundan 500 milliard so‘mi amalda undirildi. Ijro harakatlari davomida 127,4 milliard so‘mlik mulklar xatlanib, 72 milliard so‘mligi auksion savdolariga chiqarildi.
Izoh (0)