Futbol bo‘yicha Osiyo Chempionlar Ligasining 5-turida “OKMK” 27-noyabr, dushanba kuni “Al-Ittihod”ga qarshi bahs olib boradi.
Uchrashuv oldidan jamoalar bosh murabbiylari matbuot anjumanida ishtirok etdi.
Juda katta jamoaga qarshi maydonga chiqamiz. Bu Olmaliq shahri uchun tarixiy kun. Bilasiz, 4-turdan keyin guruhdan chiqish imkoniyatini to‘la yo‘qotdik. Shu sababli yigitlarda hech qanday bosim yo‘q.
Yo‘qotishlarga keladigan bo'lsak, Ruben Sanchez va Shohruh Gadoyev jarohat tufayli bizga yordam bera olishmaydi. Akrom Komilov esa diskvalifikatsiya qilingan.
Bunday katta nomlarni kerak bo‘lsa, pul to‘lab ham olib kelolmaysiz. Biz o‘z mehnatimiz evaziga buni uddaladik. Stadionga muxlislarning katta oqimi kutilyapti. Ularning oldida yopiq o‘yin ko‘rsatsak yarashmaydi. Benzema yoki qaysidir futbolchini personal ravishda yopishga emas, jamoaviy futbol ko‘rsatishga harakat qilamiz.
Mirjalol Qosimov, “OKMK” bosh murabbiyi
O‘yin uchun kerakli tayyorgarliklar ko‘rilgan. Bu biz uchun muhim bahs. Maydonda borimizni berishga harakat qilamiz. Ish boshlaganimga ko‘p bo‘lmadi. Shunga qaramay, jamoa bilan taktik va jismoniy jihatdan o‘z strategiyalarimizni aniqlab olganmiz. Futbolchilarning barchasi yuqori darajada.
Marselo Galyardo, “Al-Ittihod” bosh murabbiyi
Eslatib o‘tamiz, “Al-Ittihod” C guruhi yetakchisi bo‘lib turibdi. Jamoa 4 turdan so‘ng 9 ochko jamg‘argan. “OKMK” esa 4 ta o‘yinning barchasida mag‘lub bo‘ldi.
Izoh (0)