Futbol bo‘yicha Osiyo Chempionlar Ligasining 5-turida “Nasaf” 27-noyabr, dushanba kuni “Al-Faysali”ga qarshi bahs olib boradi.
Uchrashuv oldidan jamoalar bosh murabbiylari matbuot anjumanida ishtirok etdi.
Chempionlar ligasi guruh bosqichida hal qiluvchi palla boshlandi. Mavsum avvalidayoq maqsad sifatida keyingi bosqich yo‘llanmasi qo‘yilgan edi. Faqat g‘alaba uchun maydonga chiqamiz. Taqvim tig‘izligiga allaqachon ko‘nikib bo‘ldik. Siz xalqaro maydonda o‘ynashni xohlasangiz, shunday bo‘lishi tabiiy. Muhimi, barcha yigitlar bo‘lajak o‘yinga shay holatda. Faqatgina diskvalifikatsiya tufayli Alibek Davronovning xizmatidan foydalana olmaymiz.
Raqib Iordaniyaning eng kuchli jamoasi va faqat tajribali o‘yinchilardan tuzilgan. Ularning “Sharja” va “As-Sadd” jamoasidan farqi bitta futbolchiga bog‘lanib qolmagan. Shuningdek, jismoniy jihatdan juda yaxshi shakllangan. Bu jamoani yengish uchun katta mehnat qilishimiz kerak bo‘ladi.
Muxlislarning qo‘llab-quvvatlashi jamoaga kuch beradi. Stadionda ajoyib atmosfera bo‘ladi degan umiddamiz.
Ro‘ziqul Berdiyev, “Nasaf” bosh murabbiyi
“Nasaf”ga qarshi yaxshi o‘yin ko‘rsatish uchun keldik. Uchrashuvga ko‘ngildagidek tayyorlandik. Shogirdlarim ham berilgan ko‘rsatmalarni to‘g‘ri bajarib, qoniqarli natija ko‘rsatishlariga umid qilaman. O‘yin oldingilariga o‘xshamasligi tabiiy.
Ahmad Hayel, “Al-Faysali” bosh murabbiyi
Eslatib o‘tamiz, “Al-Faysali” B guruhida eng oxirgi o‘rinni egallab turibdi. Jamoa 4 turdan so‘ng 3 ochko jamg‘argan. “Nasaf” esa 7 ochko bilan 2-o‘rinda bormoqda.
Izoh (0)