Toshkent shahar Chilonzor tumanida qalbaki aksiz markali alkogol mahsulotlari ishlab chiqarilayotgani aniqlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.

 

Xabarga ko‘ra, Bosh prokuratura huzuridagi departamentning Toshkent shahar boshqarmasi va Chilonzor tuman bo‘limi tomonidan tuman Soliq inspeksiyasi xodimlari bilan hamkorlikda o‘tkazilgan tezkor tadbirda “R.B.” MCHJga qarashli savdo do‘koni sotuvchisi J.N. xaridor A.A.ga qalbaki QR-kod markirovkali 210 dona “Aurum” nomli alkogol mahsulotini 3,9 million so‘mga sotgan vaqtida ushlanib, ushbu do‘kondan 3 xil turdagi “Asl billur” MCHJ tomonidan ishlab chiqarilgan qalbaki aksiz markali jami 6 370 dona alkogolli mahsulotlari ashyoviy dalil sifatida olingan.

Shuningdek, tadbir davomida Chilonzor tumanidagi “Asl billur” MCHJning ishlab chiqarish sexi va omborxonasi ko‘zdan kechirilganida xufiyona tarzda ishlab chiqarilib, sotish uchun tayyorlab qo‘yilgan jami 16 715 dona qalbaki aksiz markali alkogolli mahsulotlar saqlanayotgani aniqlangan.

Bundan tashqari, “Asl billur” MCHJ mas’ul shaxslari va boshqalar alkogol mahsulotlari ishlab chiqarish uchun etil spirtini birja savdolari orqali sotib olmasdan, surishtiruv davomida shaxsini aniqlash imkoni bo‘lmagan shaxslardan naqd pulga sotib olib realizatsiya qilganliklari ma’lum bo‘lgan.

Mazkur holatlar yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish), 192-11-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.