Ijtimoiy tarmoqlarda fuqaroning shifokor ayolga hujum qilib, stul otgani aks etgan video tarqalib, keng muhokamalarga sabab bo‘ldi. Holat yuzasidan rasmiy ma’lumot berildi.
Tarqalgan xabarlarda bunday xatti-harakatni sodir etgan shaxs prokuror yordamchisi ekani ham aytilgandi. Bosh prokuratura matbuot xizmati ushbu shaxs prokuratura organlarida xizmat qilmasligini ma’lum qildi.
“O‘rganishda videoxabarda qayd qilingan shaxs OTM talabasi ekani aniqlandi. OTM manfaatlariga zarar yetkazmaslik maqsadida boshqa ma’lumotlar oshkor qilinmaydi”, — deyiladi prokuratura xabarida.
Sog‘liqni saqlash vazirligi bergan ma’lumotga ko‘ra, videodagi holat 6-noyabr kuni, Toshkent shahar 7-son klinik shifoxonasida sodir bo‘lgan.
Aniqlanishicha, shu kuni soat 16:00 lar atrofida 2001-yilda tug‘ilgan fuqaro S.A. qabulxonaning yuz-jag‘ jarrohligi xonasiga yutinishdagi og‘riqlar, chaynashning qiyinligi, ikkala tomon jag‘ osti sohasidagi shish va tana haroratining ko‘tarilishi shikoyatlari bilan murojaat qilgan. Bu paytda shifokor D.M. navbatchilikda bo‘lgan.
Fuqaro shifokor tomonidan ko‘rilganda burun-halqum va bodomsimon bezlar giperemiyalashishi kattalashgani, giperemiya butun og‘iz bo‘shlig‘i shilliq qavatiga tarqalgani, ikki tomonlama jag‘ osti va bo‘yin limfa tugunlari simmetrik kattalashgani hamda tana harorati 37,5 darajadan yuqori ekanligi aniqlangan.
Shunga ko‘ra, shifokor tomonidan bemor virus etiologiyali rinofaringit yoki infeksion mononukleozga gumon qilinib, virusolog-mutaxassis ko‘rigiga yuborilgan. Bundan esa u va yaqinlari norozi bo‘lib, shifokorga o‘ta qo‘pol munosabatda bo‘lgan va unga qarata stul otgan.
Ayni paytda mazkur holat yuzasidan ichki ishlar organlari tomonidan surishtiruv ishlari olib borilmoqda.
Izoh (0)