Ижтимоий тармоқларда фуқаронинг шифокор аёлга ҳужум қилиб, стул отгани акс этган видео тарқалиб, кенг муҳокамаларга сабаб бўлди. Ҳолат юзасидан расмий маълумот берилди.
Тарқалган хабарларда бундай хатти-ҳаракатни содир этган шахс прокурор ёрдамчиси экани ҳам айтилганди. Бош прокуратура матбуот хизмати ушбу шахс прокуратура органларида хизмат қилмаслигини маълум қилди.
“Ўрганишда видеохабарда қайд қилинган шахс ОТМ талабаси экани аниқланди. ОТМ манфаатларига зарар етказмаслик мақсадида бошқа маълумотлар ошкор қилинмайди”, — дейилади прокуратура хабарида.
Соғлиқни сақлаш вазирлиги берган маълумотга кўра, видеодаги ҳолат 6 ноябрь куни, Тошкент шаҳар 7-сон клиник шифохонасида содир бўлган.
Аниқланишича, шу куни соат 16:00 лар атрофида 2001 йилда туғилган фуқаро С.А. қабулхонанинг юз-жағ жарроҳлиги хонасига ютинишдаги оғриқлар, чайнашнинг қийинлиги, иккала томон жағ ости соҳасидаги шиш ва тана ҳароратининг кўтарилиши шикоятлари билан мурожаат қилган. Бу пайтда шифокор Д.М. навбатчиликда бўлган.
Фуқаро шифокор томонидан кўрилганда бурун-ҳалқум ва бодомсимон безлар гиперемиялашиши катталашгани, гиперемия бутун оғиз бўшлиғи шиллиқ қаватига тарқалгани, икки томонлама жағ ости ва бўйин лимфа тугунлари симметрик катталашгани ҳамда тана ҳарорати 37,5 даражадан юқори эканлиги аниқланган.
Шунга кўра, шифокор томонидан бемор вирус этиологияли ринофарингит ёки инфексион мононуклеозга гумон қилиниб, вирусолог-мутахассис кўригига юборилган. Бундан эса у ва яқинлари норози бўлиб, шифокорга ўта қўпол муносабатда бўлган ва унга қарата стул отган.
Айни пайтда мазкур ҳолат юзасидан ички ишлар органлари томонидан суриштирув ишлари олиб борилмоқда.
Изоҳ (0)