Farg‘ona viloyatining Buvayda tumanida Damas avtomobili ishtirokida YTH sodir bo‘lgani, unda maktab o‘quvchilari ham vafot etgani xabar berilgandi. Viloyat IIB axborot xizmati mazkur voqea bo‘yicha “Daryo”ga rasmiy ma’lumot berdi. 

Joriy yilning 21-noyabr kuni soat 08:20 larda Uchko‘prik tumani, “Mehnatobod” MFY hududida 2000-yilda tug‘ilgan haydovchi Sh.E Isuzu rusumli avtomobilni boshqarib ketayotib, oraliq masofani saqlamasdan svetoforning qizil ishorasida to‘xtab turgan, haydovchi 1994-yilda tug‘ilgan B.M. boshqaruvidagi Damas bilan to‘qnashib, yo‘l-transport hodisasi sodir etgan. Natijada Damas avtomashinasi yo‘lovchilari 1987-yilda tug‘ilgan M.D va 1988-yilda tug‘ilgan G.Q. (ayol)lar tan jarohati olib, voqea joyida vafot etgan, — deyiladi viloyat IIB axborot xizmati tarqatgan ma’lumotda.

Qo‘shimcha qilinishicha, hodisa oqibatida yana 4 nafar shaxs tan jarohati olib, davolanish uchun shifoxonaga yotqizilgan. 

Mazkur holat yuzasidan tuman IIB huzuridagi tergov bo‘limi tomonidan Sh.E.ga nisbatan Jinoyat kodeksining 266-moddasi 3-qismi “a” (transport vositalari harakati yoki ulardan foydalanish xavfsizligi qoidalarini buzish odamlar o‘limiga olib kelsa) bandi bilan jinoyat ishi qo‘zg‘atilib, “qamoq” ehtiyot chorasi qo‘llanilgan.