Toshkentda tez yordam chaqiruviga ko‘ra kelgan xodim bemor ayolga uyatsiz harakatlar qilgani haqida xabarlar tarqalgandi. Holat yuzasidan jinoyat ishi qo‘zg‘atildi.

Poytaxt IIBB matbuot kotibi Nilufar Isoxonovaning ma’lum qilishicha, mazkur holat yuzasidan Olmazor tumani IIO FMB tergov bo‘limi tomonidan Jinoyat kodeksining 119-moddasiga (jinsiy ehtiyojni zo‘rlik ishlatib g‘ayritabiiy usulda qondirish) asosan jinoyat ishi qo‘zg‘atilgan. Gumon qilinuvchi protsessual tartibda ushlangan.

Ushbu moddada ko‘zda tutilgan jinoyatni sodir etganlik uchun 5 yildan 8 yilgacha ozodlikdan mahrum qilish jazosi belgilangan.

Toshkentda bemor ayolning tibbiyot xodimi tomonidan jinsiy tajovuzga uchragani haqida jurnalist va bloger Shahnoza Soatova xabar bergandi. Jurnalist unga bu haqda murojaat qilgan ayol o‘zining tanishi ekani, universitetda dars berishi, o‘zicha voqealar o‘ylab topishdan manfaati yo‘qligini bildirib, Ichki ishlar vazirligi mas’ullari, sog‘liqni saqlash vazirligini bu masalaga e’tibor qaratishlarini so‘ragandi.

Holatga Sog‘liqni saqlash vazirligi munosabat bildirib, holat yuzasidan vazirlik ishchi guruhi tomonidan o‘rganish olib borilayotganini, vaziyatga aniqlik kiritilmaguncha jamoatchilik vakillaridan masalani turlicha talqin qilmaslikni so‘ragandi.