Iqtisodiyot va moliya vazirligi “Moyli urug‘larni qayta ishlovchi korxonalarning eksport salohiyatini oshirish chora-tadbirlari to‘g‘risida”gi Vazirlar Mahkamasi qarori loyihasini muhokamaga qo‘ydi.
Hujjat bilan xo‘jalik yurituvchi subyektlarga ularning tashkiliy-huquqiy shaklidan qatʼiy nazar, o‘zlari import qilgan kungaboqar urug‘i va texnik chigitni qayta ishlash orqali ishlab chiqarilgan o‘simlik yog‘ini yoki o‘zlari import qilgan o‘simlik yog‘ini O‘zbekiston bojxona hududidan tashqariga olib chiqish (eksport qilish)ga ruxsat berilmoqda.
Bunda, xo‘jalik yurituvchi subyektlar tomonidan eksport qilinadigan o‘simlik yog‘i miqdori ular tomonidan import qilingan kungaboqar urug‘i va texnik chigit miqdorining 15 foizidan yoki import qilingan o‘simlik yog‘i miqdorining 50 foizidan ortiq bo‘lishi mumkin emas.
Shuningdek, kungaboqar va paxta yog‘i (TIF TN kodi 1512) hamda aralash yog‘lar (TIF TN kodi 1517909100)dan tashqari boshqa o‘simlik va meva urug‘lari yog‘larini O‘zbekiston bojxona hududidan tashqariga olib chiqish (eksport qilish) bo‘yicha cheklovlar bekor qilinmoqda.
Eslatib o‘tamiz, O‘zbekistonda paxta yog‘i narxlari may oyida o‘rtacha 1,3 foizga arzonlashgandi. O‘sha davrda paxta yog‘i narxlari 2023-yil boshidan beri o‘rtacha 7,4 foizga pastlagani kuzatilgan.
Izoh (0)