O‘zbekistonda paxta yog‘i narxlari bir oyda o‘rtacha 1,3 foizga arzonlashgan. Bu haqda Statistika agentligi axborot xizmati xabar berdi.
Unga ko‘ra, 2023-yilning may oyida paxta yog‘i narxlari aprel oyiga nisbatan, yaʼni bir oyda o‘rtacha 1,3 foizga arzonlashgan. Paxta yog‘i narxlari 2023-yil boshidan beri o‘rtacha 7,4 foizga arzonlashgani kuzatilgan. 2023-yilning may oyida o‘tgan oyga nisbatan:
- o‘simlik yog‘lari narxlari o‘rtacha 1,7 foizga arzonlashgan;
- kungaboqar moyi narxlari o‘rtacha 2,1 foizga arzonlashgan.
- sariyog‘ narxlari o‘rtacha 0,7 foizga oshgan.
O‘tgan haftada birja savdolarida 1288 tonna paxta yog‘i sotildi. O‘tkazilgan savdolarda har kuni o‘rtacha 19 ta xaridor ishtirok etdi.
Ko‘rib chiqilayotgan davrda barcha navli paxta yog‘ining kunlik o‘rtacha narxlari mahsulotning bir tonnasi uchun 15,7 mln so‘mdan 14,9 mln so‘mgacha pasaydi.