Telegram’dagi kanallarning birida Qashqadaryo viloyatining Qarshi tumanidagi maktab o‘qituvchilari hokimlik tomonidan soliq to‘lashga majburlanayotgani xabar berildi. Hokimlik axborot xizmati mazkur xabarga raddiya berdi.
Ijtimoiy tarmoqning Telegram messenjeridagi kanallarning birida Qarshi tumanida hokimlik topshirig‘i bilan o‘qituvchilarning kadastr hujjatlari olinib, uch kun muddat ichida ularga soliq to‘lash majburiyati qo‘yilgani bayon etilgan xabar e’lon qilindi. Tuman hokimligi axborot xizmati mazkur xabarni rad etib, asoslanmaganini ma’lum qiladi, — deyiladi bu haqdagi ma’lumotlarga javob qaytargan Qarshi tumani hokimligi axborot xizmati xabarida.
Hokimlikning qo‘shimcha qilishicha, nafaqat o‘qituvchilar, soliq to‘lashi lozim bo‘lgan barcha fuqarolardan soliq undirish vakolatiga ega alohida tashkilot bor. Va shu sabab hokimlikning noqonuniy tarzda o‘qituvchilarga bunday majburiyat yuklashiga asos yo‘q.
Hokimlik axborot xizmati O‘zbekiston qonunchiligiga ko‘ra, respublikada fuqarolardan soliq undirish majburiyatini olgan va bu ish bilan shug‘ullanuvchi mas’ul tashkilotlar borligini, soliq to‘lash har bir fuqaroning burchi ekanini eslatib, bunga fuqarolarni majburlashga asos yo‘qligini eslatib o‘tadi. Qolaversa, ijtimoiy tarmoq foydalanuvchilaridan har bir axborotni tekshirib, to‘g‘ri va aniq axborot tarqatish lozimligini, noto‘g‘ri axborot tarqatish javobgarlikka olib kelishini eslatib o‘tadi, — deydi hokimlik axborot xizmati rahbari To‘lqin Turdiyev.
Izoh (0)