Telegram’даги каналларнинг бирида Қашқадарё вилоятининг Қарши туманидаги мактаб ўқитувчилари ҳокимлик томонидан солиқ тўлашга мажбурланаётгани хабар берилди. Ҳокимлик ахборот хизмати мазкур хабарга раддия берди.
Ижтимоий тармоқнинг Telegram мессенжеридаги каналларнинг бирида Қарши туманида ҳокимлик топшириғи билан ўқитувчиларнинг кадастр ҳужжатлари олиниб, уч кун муддат ичида уларга солиқ тўлаш мажбурияти қўйилгани баён этилган хабар эълон қилинди. Туман ҳокимлиги ахборот хизмати мазкур хабарни рад этиб, асосланмаганини маълум қилади, — дейилади бу ҳақдаги маълумотларга жавоб қайтарган Қарши тумани ҳокимлиги ахборот хизмати хабарида.
Ҳокимликнинг қўшимча қилишича, нафақат ўқитувчилар, солиқ тўлаши лозим бўлган барча фуқаролардан солиқ ундириш ваколатига эга алоҳида ташкилот бор. Ва шу сабаб ҳокимликнинг ноқонуний тарзда ўқитувчиларга бундай мажбурият юклашига асос йўқ.
Ҳокимлик ахборот хизмати Ўзбекистон қонунчилигига кўра, республикада фуқаролардан солиқ ундириш мажбуриятини олган ва бу иш билан шуғулланувчи масъул ташкилотлар борлигини, солиқ тўлаш ҳар бир фуқаронинг бурчи эканини эслатиб, бунга фуқароларни мажбурлашга асос йўқлигини эслатиб ўтади. Қолаверса, ижтимоий тармоқ фойдаланувчиларидан ҳар бир ахборотни текшириб, тўғри ва аниқ ахборот тарқатиш лозимлигини, нотўғри ахборот тарқатиш жавобгарликка олиб келишини эслатиб ўтади, — дейди ҳокимлик ахборот хизмати раҳбари Тўлқин Турдиев.
Изоҳ (0)