Buyuk Britaniyaning Nyukasl universiteti olimlari muzliklar erishi oqibatida to‘rtta davlat – Hindiston, Pokiston, Peru va Xitoyda millionlab odamlar suv ostida qolishi mumkinligini ma’lum qildi. Bu haqda Science alert xabar berdi.
Bu mamlakatlarning aholisi iqlim ofatlariga ta’sirchan, davlatlarda esa muzlagan ko‘llar (muzlik o‘ygan chuqurliklarda paydo bo‘lgan ko‘llar) soni ko‘p. Tabiiy ofatlar bo‘yicha tadqiqotchi Karolin Teylor boshchiligidagi tadqiqot shuni ko‘rsatadiki, 15 millionga yaqin odam muzliklar erishi oqibatida xavf ostida bo‘lishi mumkin. Muz ko‘llarining qachon erishini oldindan aytish juda qiyin, shuning uchun olimlar hozircha xavf haqida ogohlantirishi mumkin.
Tadqiqot davomida olimlar muzlik ko‘llarining holati, ularning hajmi, soni haqida ma’lumot to‘pladi va o‘rgandi. Keyin ular so‘nggi 10 yil ichida hajmi oshgan muz ko‘llariga e’tibor qaratdi. Olimlar asosiy xavf eng yirik muzlik ko‘llarining yaqinligida emas, balki mintaqada yashovchi aholi soni va ularning tabiiy ofatlarga bardosh bera olishida ekanini aniqladi.
Tadqiqotda Osiyoning baland tog‘lari aholisi mazkur xavfga bardoshsiz ekani, Pokiston va Xitoyda muz ko‘llarining erishi xavfi yuqoriligi aniqlandi. Pokistonda muzlik erishi ehtimoli yuqori bo‘lgan hududda 2 milliondan ortiq, Xitoyda esa bundan deyarli ikki baravar ko‘p odam yashaydi. Ushbu xavfli reytingda Peru uchinchi, Hindiston esa to‘rtinchi o‘rinda turadi.
Izoh (0)