Тинч океанида жойлашган Тувалу орол давлати чўкмоқда, унинг аҳолиси Австралияга кўчирилади. Бу ҳақда Associated Press хабар берди.
Австралия иқлим ўзгариши оқибатида денгиз сатҳининг кўтарилиши ва кучайиб бораётган бўронлар оқибатларини юмшатишда Тувалуга ёрдам таклиф қилди. Австралия бош вазири Энтони Альбанезе туваликларни қутқариш режасини эълон қилди. Бу ҳар йили 280 кишини Австралияга жўнатиб, барча орол аҳолисини босқичма-босқич кўчириш имконини беради. Тувалу 11 минг аҳолига эга эканини ҳисобга олса, “эвакуация” 40 йилдан озроқ вақтни олади.
“Биз Тувалу аҳолиси бошқа жойда яшаш, ўқиш ва ишлаш ҳуқуқига лойиқ деб ҳисоблаймиз, чунки глобал иқлим ўзгаришининг салбий таъсири кучайиб бормоқда”, — дейди Энтони Альбанезе.
Туваликларни кўчиришдан ташқари, Австралия орол мамлакатининг океан томонидан сўрилишини секинлаштириши керак бўлган ишларни молиялаштиришга, шунингдек, табиий офатлар юз берганда Тувалуга ёрдам беришга ваъда берди. Тувалу аҳолиси автоматик равишда Австралия фуқаролигини олмайди, аммо кейинроқ бу бўйича сўров юборишлари мумкин.
Тhе Guardian нашрининг ёзишича, Австралия қарорига Тинч океани ороллари вакилларининг танқид даражасини бир оз пасайтириш истаги сабаб бўлган бўлиши мумкин. Улар Канберрани Тинч океани минтақасида иқлим ўзгаришига қарши етарлича курашмаётганликда айбламоқда, масалан, Австралияда нефть ва газ қазиб олишни чеклашни хоҳлайди.
The New York Times газетасига кўра, бундай саховатли таклиф Австралияга сўнгги пайтларда Тинч океанидаги орол давлатлар, масалан, Соломон ороллари билан алоқаларни ривожлантиришга фаол ҳаракат қилаётган Хитойга қаршилик кўрсатишга ёрдам бериши керак.
Изоҳ (0)