Самарқанд вилояти Тойлоқ туманида ички ишлар ходимлари тадбиркор аёлларга куч ишлатгани акс этган видео тарқалди. Туман ҳокимлиги ахборот хизмати ҳолат юзасидан тушунтириш берди.
Хабарга кўра, Тойлоқ тумани “Илмобод” маҳалласида яшовчи фуқаро Лўбат Эштўхтаева ва Зарина Жўраевалар Самарқанд вилояти “Сувоқова” давлат унитар корхонаси Тойлоқ туман филиали балансида бўлган 10 сотих ер майдонини ноқонуний равишда эгаллаб, атрофини узунлиги 25 метрдан иборат девор қуриб олган.
Мазкур ер майдонида ичимлик суви иншоотини қуриш бўйича Тойлоқ тумани ҳокимининг 2019 йил 18 апрелдаги 1045-сонли қарори қабул қилинган. Ерга даъво қилаётган фуқаро Эштўхтаева Лўбат эса ерга эгалик ҳуқуқини берувчи ҳеч қандай ҳужжат мавжуд эмас. Шу боисдан Кадастр палатаси Тойлоқ туман филиали томонидан ўзбошимчалик билан қуриб олган деворни ўз хоҳиши билан белгиланган муддат ичида бузиб, ўз ҳолига қайтариб қўйиш бўйича огоҳлантириш берилган.
Бироқ фуқаро огоҳлантиришларга қарамай ноқонуний қурилган деворни бузмаган. Мазкур ер майдонига ичимлик суви минорасини қуриб, “Илмобод” ҳамда “Бунёдкор” маҳаллалари аҳолисини тоза ичимлик суви билан таъминлаш мақсадида жорий йилнинг 13 ноябрь куни вилоят ҳамда туман ҳокимлиги томонидан тузилган ишчи гуруҳ иштирокида мазкур қурилма бузилиб, ҳолат тегишли тартибда расмийлаштирилган.
Бузиш жараёнига фуқаро Лўбат Эштўхтаева ҳамда унинг қариндошлари фаол қаршилик кўрсатган. Жараёнда жамоат тартибини сақлаш ҳамда фуқароларнинг хавфсизлигини таъминлаш мақсадида ИИБ ходимлари жалб қилинган.
Изоҳ (0)